«Хитайларни санаәткә, уйғурларни көчүшкә» тәшкилләш ғулғула қозғимақта

Мухбиримиз әзиз
2019-09-10
Елхәт
Пикир
Share
Принт

Йеқиндин буян хитай һөкүмитиниң уйғур дияридики аталмиш «тәрәққият» һәққидә сөз болғанда әслидә чөллүк болған тумшуқ районида бәрпа болған шәһәрни алаһидә махтинип тилға еливатқанлиқи мәлум.

«Биңтуән хәвәрлири» гезитиниң 10-сентәбирдики хәвиридә 3-девизийә тәвәсидә хитайлар үчүн қурулған тумшуқ шәһириниң йоқлуқтин барлиққа келиши вә һазирқидәк заманиви санаәт шәһиригә йүзлинишини хитай компартийәсиниң уйғурлар дияридики ғәмхорлуқиниң «шанлиқ нәтиҗиси» дәп тәсвирләнгән.

Хәвәрдә ейтилишичә, тумшуқ шәһириниң асаси 1950-йили бу җайға йетип кәлгән хитай армийәсиниң боз йәр ечиши билән барлиққа кәлгән. Әмдиликтә болса тумшуқ шәһири «җәнубий шинҗаңдики санаәт тәрәққиятиниң әң муһим нуқтилириниң бири» дәп бекитилгән.

Һалбуки, әвладтин-әвладқа тарим вадисидики бостанлиқларда һаят кәчүрүп кәлгән уйғурлар йеқинқи йилларда арқиму-арқидин «намратлиққа ярдәм бериш» намида әслидики ана маканлиридин көчүрүлүп, наһийә базиридики бина өйләргә көчүрүлмәктә икән. Шинхуа агентлиқиниң 9-сентәбирдики хәвиридә қағилиқ наһийәсиниң чипан йезисидики уйғурлардин абабәкри хәлпәтни мушу шәкилдә наһийә базириға көчүрүп кәткәнлик уйғурларни «очаққа от йеқиш» кәби бирқатар җапалардин халас қилишниң мисали сүпитидә тәсвирләнгән. Мәлум болушичә чипан йезисидики аһалиләр көчүрүлүп башқа җайларға орунлаштурулған.

Һалбуки, уйғурларниң ана маканлирини чеқип ташлап уларни шәһәрләрдики бина өйләргә топлаш һадисисини уйғур зиялийлири «уйғурларниң мәдәнийәт мираслирини вәйран қилиш қилмиши» дәп тәнқидлисә, хитай зиялийлиридин ваң лишйоң бу хил һадисиләрни «һөкүмәтниң уйғурларни техиму үнүмлүк контрол қилиш арзусиниң ипадиси» дегәниди.

Пикирләр (0)
Share
Толуқ бәт