Xitay hökümitining Uyghurlargha "Alahide mu'amile" qiliwatqanliqi endishe qozghimaqta

Muxbirimiz eziz
2019-12-17
Élxet
Pikir
Share
Print

Uyghur aptonom rayonluq hökümetning re'isi shöhret zakir yéqinda béyjingda lagérlarni aqlap "Kespiy terbiyelesh mektepliridiki kursantlarning köp qismi oqush püttürüp, jem'iyet qoynigha qaytip keldi," dégen idi.

16-Dékabir küni "Washin'gton pochtisi géziti" tehrirat maqalisi élan qilip, "Oqush püttürdi" dégen atalghuning buningdin kéyinki lagér tutqunlirining yéngi teqdiridin bésharet bériwatqanliqini alahide mulahize qildi.

Tehrirat maqaliside körsitilishiche, lagérdiki tutqunlarning milliy we diniy kimlikidin waz kéchish, xitayche til öginishke mejburlinish arqiliq Uyghurgha xas til, din we medeniyet amilliri pütünley yoqitiliwatqan ehwalda ularning némidin oqush püttürgenlikige chong bir so'al qoyulidiken. Shundaqla hazirghiche melum bolghan köpligen ishenchlik uchurlardin "Oqush püttürgen" kursantlarning emeliyette lagérlardin héchqanche perq qilmaydighan zawut-fabrikilargha ishchiliqqa ewetiliwatqanliqi, bu zawutlarning lagérlargha qoshna orunlarda yaki lagérlarning yer astigha jaylashqanliqi bayan qilin'ghan. Gérmaniyelik tetqiqatchi adryan zénz xitay hökümiti tarqatqan ichki höjjetler asasidiki izdinishliri arqiliq xitay hökümitining bu qilmishni tipik bolghan "Nishanliq medeniyet qirghinchiliqi" dep körsetmekte.

Bolupmu xitay hökümiti tarqatqan bezi uqturushlarda toqsu we yeken nahiyeliridiki bir qisim zawutlarning "Yérim herbiyche bashqurulidighanliqi", buninggha kéreklik saqchi we alahide oqutquchilarni hökümet terep temin étidighanliqi éytilghan. Halbuki, bu tutqunlarning mutleq köp qismi lagérlargha qamilishtin burun özige tonushluq hüner-kesip saheside alliqachan "Piship bolghan" kishiler bolup, "Washin'gton pochtisi géziti" ning tehrirat maqaliside bu xildiki mejburiy emgek sheklining yéterlik diqqet qozghishi alahide eskertilidu.

Toluq bet