Мәдәний-маарип саһәсидики уйғур таянч кадирлар «үч хил күч» кә қарши қәсәмяд паалийитигә селинмақта

Мухбиримиз әзиз
2017-08-22
Елхәт
Пикир
Share
Принт

Уйғурлар дияридики ешип бериватқан сиясий бесимларниң бир ипадиси «үч хил күч» вә «диний әсәбийлик» кә қарши очуқ хәт һәмдә очуқ вәдинамиләр елан қилиш шәклидә әкс етиватқанлиқи мәлум.

Әмдиликтә болса мәдәнийәт вә маарип саһәсидики таянч күч болуватқан бир қисим уйғур кадирларниң мәдәнийәт вә тарих нуқтисидин бу күрәшкә мәҗбурлиниватқанлиқи диққәт қозғиди.

«Шинҗаң гезити» ниң 21-авғуст санида 2- вә 3-бәтни лиқ алған вәдинамиләр қатарида бортала областлиқ маарип хизмәт комитетиниң секретари пәрһат тохтиниң уйғурларға хитай кимликини тәвсийә қилиш асасий мәзмун қилинған очуқ хети бесилған. Униңда уйғурлар пәқәт «җуңхуа миллити ортақ гәвдиси еңини чоңқур сиңдүргәндила парлақ кәлгүсиниң болидиғанлиқи» алға сүрүлгән.

Аптоном районлуқ музейниң муавин башлиқи таһирҗан летипниң очуқ вәдинамисидә болса бир қисим зораван күчләрниң «уйғур» дегән сөзни «террорчи» дегән сөзниң йәнә бир вариянтиға айландуруп қойғанлиқи алаһидә тәкитләнгән, шуниңдәк уйғурларға «бәхтияр турмуш» ни кимниң ата қилғанлиқини унтуп қалмаслиққа чақирған.

Буларға қошулуп «шинҗаң гезити» ниң 22-авғусттики хитайчә нәшригә «күсән тәтқиқат мәркизи» ниң муавин мудири тәләт обул язған уйғурларниң диний етиқад тарихи һәққидики мақалиси бесилған. Униңда уйғурларниң ислам диниға етиқад қилиштин илгири көп хил динларға етиқад қилғанлиқи баян қилинип, «пан исламизм» вә «пан түркизм» ниң йеқинқи заманниң мәһсули икәнлики, һазирқи мәзгилниң уйғурлар тарихидики «әң бәхтияр вә әң әркин» басқуч икәнлики алаһидә тәкитләнгән.

Мәлум болушичә, буниңға охшап кетидиған қарашлардин бири, бу йил апрел ейида хотәнниң қорчақ валиси әзиз мусаниң «уйғурлар һон яки түркләрниң әвлади әмәс, бәлки җуңхуа миллити» дегән мақалисидә оттуриға қоюлған.

Пикирләр (0)
Share
Толуқ бәт