Medeniy-ma'arip sahesidiki Uyghur tayanch kadirlar "Üch xil küch" ke qarshi qesemyad pa'aliyitige sélinmaqta

Muxbirimiz eziz
2017-08-22
Élxet
Pikir
Share
Print

Uyghurlar diyaridiki éship bériwatqan siyasiy bésimlarning bir ipadisi "Üch xil küch" we "Diniy esebiylik" ke qarshi ochuq xet hemde ochuq wedinamiler élan qilish sheklide eks étiwatqanliqi melum.

Emdilikte bolsa medeniyet we ma'arip sahesidiki tayanch küch boluwatqan bir qisim Uyghur kadirlarning medeniyet we tarix nuqtisidin bu küreshke mejburliniwatqanliqi diqqet qozghidi.

"Shinjang géziti" ning 21-awghust sanida 2- we 3-betni liq alghan wedinamiler qatarida bortala oblastliq ma'arip xizmet komitétining sékrétari perhat toxtining Uyghurlargha xitay kimlikini tewsiye qilish asasiy mezmun qilin'ghan ochuq xéti bésilghan. Uningda Uyghurlar peqet "Jungxu'a milliti ortaq gewdisi éngini chongqur singdürgendila parlaq kelgüsining bolidighanliqi" algha sürülgen.

Aptonom rayonluq muzéyning mu'awin bashliqi tahirjan létipning ochuq wedinamiside bolsa bir qisim zorawan küchlerning "Uyghur" dégen sözni "Térrorchi" dégen sözning yene bir wariyantigha aylandurup qoyghanliqi alahide tekitlen'gen, shuningdek Uyghurlargha "Bextiyar turmush" ni kimning ata qilghanliqini untup qalmasliqqa chaqirghan.

Bulargha qoshulup "Shinjang géziti" ning 22-awghusttiki xitayche neshrige "Küsen tetqiqat merkizi" ning mu'awin mudiri tel'et obul yazghan Uyghurlarning diniy étiqad tarixi heqqidiki maqalisi bésilghan. Uningda Uyghurlarning islam dinigha étiqad qilishtin ilgiri köp xil dinlargha étiqad qilghanliqi bayan qilinip, "Pan islamizm" we "Pan türkizm" ning yéqinqi zamanning mehsuli ikenliki, hazirqi mezgilning Uyghurlar tarixidiki "Eng bextiyar we eng erkin" basquch ikenliki alahide tekitlen'gen.

Melum bolushiche, buninggha oxshap kétidighan qarashlardin biri, bu yil aprél éyida xotenning qorchaq walisi eziz musaning "Uyghurlar hon yaki türklerning ewladi emes, belki jungxu'a milliti" dégen maqaliside otturigha qoyulghan.

Toluq bet