Хитай уйғур дияриниң җәнубидики 207 орунда «бәхт санаторийәси» қуридикән

Мухбиримиз әркин
2020-05-22
Елхәт
Пикир
Share
Принт

Хитай һөкүмити зор миқдарда мәбләғ аҗритип, уйғур аптоном районидики йеза-кәнтләрдә 207 орунға яшанғанлар «бәхт санаторийәси» қурушни қарар қилған. «Шинҗаң гезити» ниң хәвәр қилишичә, уйғур аптоном районлуқ хәлқ ишлар назарити нөвәттә бу орунларда қурулуш башланғанлиқи, пүтүн қурулушниң 30-июнға қәдәр пүтидиғанлиқини билдүргән. Хитай даирилириниң пилани райондики һәр бир йеза-базарда бир яшанғанлар «бәхт санаторийәси» болушини ишқа ашурушкән.

Мәлум болушичә, 207 орундики санаторийә қурулушиға 1милярд 458 милйон йүән мәбләғ селинидиған болуп, бу орунлар нуқтилиқ һалда районниң җәнубидики 22 наһийәдә қурулидикән. Мәзкур қурулуш хитай һөкүмити нурғун уйғурларни лагерларға қамиған, қалған яш уйғур әмгәк күчлирини районниң ичи-сиртидики хитай карханилирида ишләшкә мәҗбурий йөткәп, нурғун балиларниң йетим қелиши, яшанғанларниң қаранчуқсиз қелишини кәлтүрүп чиқарған мәзгилдә йолға қоюлған.

Хитай һөкүмити илгири районда нурғун йәслиләрни қуруп, ата-аниси лагер яки карханиларда тутуп турулуватқан қаранчуқсиз балиларни бу орунларға йиғивалған. Бу арқилиқ уларниң аилиси вә әнәниси билән болған беғи үзүп ташланғаниди. Көзәткүчиләрниң тәкитлишичә, хитайниң «бәхт санаторийәлири» ни қуруш пилани охшаш бир вақитта йәнә пәрзәнтлири тутуп кетилип, қаранчуқсиз қалған уйғур яшанғанлирини йиғивелип башқурушниму мәқсәт қилидикән. «Шинҗаң гезити» ниң хәвиридә, бу сиясәтниң «мәркәзләштүрүп ғәмхорлуқ қилиш» икәнлики тәкитләнгән.

Пикирләр (0)
Share
Толуқ бәт