Уйғур кишилик һоқуқ тәшкилати хитайни уйғурларниң сиясий вәкиллик орнини көпәйтишкә чақирди

Мухбиримиз әркин
2017-10-30
Елхәт
Пикир
Share
Принт

Америкидики уйғур кишилик һоқуқ қурулуши тәшкилати уйғурларниң нопуси билән уларниң уйғур районидики сиясий вәкиллик орнида зор тәңпуңсизлиқ барлиқини оттуриға қоюп, хитай һөкүмитини бу тәңпуңсизлиқни тәңшәшкә, уларниң һакимийәттики вәкиллик орнини көпәйтишкә чақирди.

Мәзкур тәшкилат дүшәнбә күни елан қилған баянатида, бу районниң «рәсими нами шинҗаң уйғур аптоном райони болсиму, бирақ һөкүмәт вә коммунистик партийәниң юқири дәриҗилик һоқуқлирини хитайлар игиләп турмақта» дейилгән.

Мәзкур тәшкилатниң баянатта көрситишичә, чен чүәнгониң уйғурларни нишанлиқ бастуруш нәтиҗисидә сиясий бюроға кириши, уйғурларниң сиясий, иқтисади, иҗтимаий, мәдәнийәт һәқ-һоқуқлирини вә шундақла уларниң һакимийәттики вәкиллик орнини техиму азайтидикән. Уйғур аптоном районлуқ партком секретари чен чүәнго йеқинда чақирилған хитай компартийисиниң 19‏-нөвәтлик мәмликәтлик қурултийида сиясий бюрониң әзалиқиға тәйинләнгән.

Бәзи көзәткүчиләр, униң сиясий бюроға кириши, бейҗиң даирилириниң униң уйғур районида йүргүзүп кәлгән қаттиқ қол сияситини тәстиқлиғанлиқ, дәп көрсәткән иди.

Уйғур кишилик һоқуқ қурулушиниң қәйт қилишичә, аптоном райони уйғурларниң намида болсиму, бирақ аптоном райондики юқири дәриҗилик 81 орунниң 64% ни хитайлар, аран 20% ни уйғурлар игилләйдикән.

Мәзкур тәшкилат баянатида йәнә, хитайниң рәсмий истатистикисида уйғур райони нопусиниң 45.84 Пирсәнтини уйғурлар игиллисиму, бирақ партийә вә һөкүмәт сепидики вилайәт дәриҗилик 28 орунниң 21% уйғурлар, 50% хитайлар, қалғинини башқа милләтләр тәшкил қилидиғанлиқини билдүрүп, хитай һөкүмитини уларниң һакимийәт ишлириға қатнишишни көпәйтишкә, бу җәһәттики тосалғуларни елип ташлашқа чақирған.

Пикирләр (0)
Share
Толуқ бәт