Uyghur kishilik hoquq teshkilati xitayni Uyghurlarning siyasiy wekillik ornini köpeytishke chaqirdi

Muxbirimiz erkin
2017-10-30
Élxet
Pikir
Share
Print

Amérikidiki Uyghur kishilik hoquq qurulushi teshkilati Uyghurlarning nopusi bilen ularning Uyghur rayonidiki siyasiy wekillik ornida zor tengpungsizliq barliqini otturigha qoyup, xitay hökümitini bu tengpungsizliqni tengsheshke, ularning hakimiyettiki wekillik ornini köpeytishke chaqirdi.

Mezkur teshkilat düshenbe küni élan qilghan bayanatida, bu rayonning "Resimi nami shinjang Uyghur aptonom rayoni bolsimu, biraq hökümet we kommunistik partiyening yuqiri derijilik hoquqlirini xitaylar igilep turmaqta" déyilgen.

Mezkur teshkilatning bayanatta körsitishiche, chén chüen'goning Uyghurlarni nishanliq basturush netijiside siyasiy byurogha kirishi, Uyghurlarning siyasiy, iqtisadi, ijtima'iy, medeniyet heq-hoquqlirini we shundaqla ularning hakimiyettiki wekillik ornini téximu azaytidiken. Uyghur aptonom rayonluq partkom sékrétari chén chüen'go yéqinda chaqirilghan xitay kompartiyisining 19‏-nöwetlik memliketlik qurultiyida siyasiy byuroning ezaliqigha teyinlen'gen.

Bezi közetküchiler, uning siyasiy byurogha kirishi, béyjing da'irilirining uning Uyghur rayonida yürgüzüp kelgen qattiq qol siyasitini testiqlighanliq, dep körsetken idi.

Uyghur kishilik hoquq qurulushining qeyt qilishiche, aptonom rayoni Uyghurlarning namida bolsimu, biraq aptonom rayondiki yuqiri derijilik 81 orunning 64% ni xitaylar, aran 20% ni Uyghurlar igilleydiken.

Mezkur teshkilat bayanatida yene, xitayning resmiy istatistikisida Uyghur rayoni nopusining 45.84 Pirsentini Uyghurlar igillisimu, biraq partiye we hökümet sépidiki wilayet derijilik 28 orunning 21% Uyghurlar, 50% xitaylar, qalghinini bashqa milletler teshkil qilidighanliqini bildürüp, xitay hökümitini ularning hakimiyet ishlirigha qatnishishni köpeytishke, bu jehettiki tosalghularni élip tashlashqa chaqirghan.

Toluq bet