Хитай хәлқ қурултийиниң уйғур ели вәкиллири түрлүк муқамларда пикир баян қилған

Мухбиримиз қутлан
2015-03-09
Елхәт
Пикир
Share
Принт

Хитай һөкүмәт таратқулириниң хәвиригә қариғанда, нөвәттә бейҗиңда ечиливатқан икки йиғин мәзгилидә уйғур елидин барған вәкилләр түрлүк муқамларда пикир баян қилған.

Мәлум болушичә, уйғур елидин талланған бир қисим хитай вәкилләр қандақ қилип «шинҗаңни хитайниң әң чоң енергийә базисиға, көчмә нопусни йәрләштүрүш райониға вә хәлқара сода түгүнигә айландуруш» пикрини бәргән.

Җуңго җәнуб һава йоллири ширкити шинҗаң шөбисиниң баш директори, хитай мәмликәтлик хәлқ қурултийиниң уйғур елидин талланған вәкиллириниң бири фу пуйән «шинҗаңни җуңгодики дубәйгә айландуруш» тәклипини бәргән.

Һалбуки, уйғур вәкилләрниң көп қисми түрлүк муқамларда пикир бәргән болсиму, әмма уларниң сөзлири аталмиш «муқимлиқни қоғдаш» ни алдинқи шәрт қилған.

Атақлиқ дарваз адил һошур «мәдәнийәт арқилиқ муқимлиқни қоғдаш» ни, дилнар абдулла «хурапий идийәләрдин азад болуп, заманиви аяллардин болуш» ни, вәкил мухтәбәр садиқ «әсәбийликни түгитиштә аялларниң ролиниң муһимлиқи» ни, вәкил рәйһангүл имир аялларниң ишәнчиниң хизмәттин келидиғанлиқини, вәкил хасийәт ели «муқимлиқни қоғдашта аялларниңму қалқан болалайдиғанлиқи» ни алаһидә тәкитлигән.

Уйғур вәкилләр ичидә халидә абдуқадир башқиларға охшимайдиған тәклип-пикир бәргән. У «миллий територийәлик аптономийә түзүмини мукәммәлләштүрүш вә униңда чиң туруш, аз санлиқ милләтләрниң илғар әнәниви мәдәнийитини қоғдаш һәмдә тәрәққий қилдуруш» һәққидә тәклип бәргән.

Хәлқарадики көзәткүчиләр билән мустәқил сиясий анализчилар, уйғур аптоном районидин хитай мәмликәтлик хәлқ қурултийи һәм сиясий кеңәшкә таллинидиған уйғур вәкилләр билән хитай вәкилләрниң пикир әркинлики җәһәттә ички чәклиминиң мәвҗутлуқини илгири сүрмәктә.

Пикирләр (0)
Share
Толуқ бәт