Xitay xelq qurultiyining Uyghur éli wekilliri türlük muqamlarda pikir bayan qilghan

Muxbirimiz qutlan
2015-03-09
Élxet
Pikir
Share
Print

Xitay hökümet taratqulirining xewirige qarighanda, nöwette béyjingda échiliwatqan ikki yighin mezgilide Uyghur élidin barghan wekiller türlük muqamlarda pikir bayan qilghan.

Melum bolushiche, Uyghur élidin tallan'ghan bir qisim xitay wekiller qandaq qilip "Shinjangni xitayning eng chong énérgiye bazisigha, köchme nopusni yerleshtürüsh rayonigha we xelq'ara soda tügünige aylandurush" pikrini bergen.

Junggo jenub hawa yolliri shirkiti shinjang shöbisining bash diréktori, xitay memliketlik xelq qurultiyining Uyghur élidin tallan'ghan wekillirining biri fu puyen "Shinjangni junggodiki dubeyge aylandurush" teklipini bergen.

Halbuki, Uyghur wekillerning köp qismi türlük muqamlarda pikir bergen bolsimu, emma ularning sözliri atalmish "Muqimliqni qoghdash" ni aldinqi shert qilghan.

Ataqliq darwaz adil hoshur "Medeniyet arqiliq muqimliqni qoghdash" ni, dilnar abdulla "Xurapiy idiyelerdin azad bolup, zamaniwi ayallardin bolush" ni, wekil muxteber sadiq "Esebiylikni tügitishte ayallarning rolining muhimliqi" ni, wekil reyhan'gül imir ayallarning ishenchining xizmettin kélidighanliqini, wekil xasiyet éli "Muqimliqni qoghdashta ayallarningmu qalqan bolalaydighanliqi" ni alahide tekitligen.

Uyghur wekiller ichide xalide abduqadir bashqilargha oxshimaydighan teklip-pikir bergen. U "Milliy téritoriyelik aptonomiye tüzümini mukemmelleshtürüsh we uningda ching turush, az sanliq milletlerning ilghar en'eniwi medeniyitini qoghdash hemde tereqqiy qildurush" heqqide teklip bergen.

Xelq'aradiki közetküchiler bilen musteqil siyasiy analizchilar, Uyghur aptonom rayonidin xitay memliketlik xelq qurultiyi hem siyasiy kéngeshke tallinidighan Uyghur wekiller bilen xitay wekillerning pikir erkinliki jehette ichki cheklimining mewjutluqini ilgiri sürmekte.

Toluq bet