ئۇيغۇرلار دىيارىدىكى يېزا-قىشلاقلارنىڭ ناملىرى «قىزىل» لاشماقتا

مۇخبىرىمىز ئەزىز
2018-06-19
ئېلخەت
پىكىر
Share
پرىنت

خىتاي ھۆكۈمىتىنىڭ نۆۋەتتە ئۇيغۇرلار دىيارىدىكى ھەممىلا شەيئىنى قىزىللاشتۇرۇش ۋە خىتايچىلاشتۇرۇش ھەرىكىتىنىڭ كۈچىيىشىگە ئەگىشىپ، ئەسلىدىكى ئۇيغۇرچە يېزا-قىشلاق ناملىرىنىڭ «ئىنقىلابىي» ناملارغا ئالماشتۇرىلىۋاتقانلىقى دىققەت قوزغىماقتا. مەلۇم بولۇشىچە، بۇ ھەرىكەت ئۇيغۇرلارنىڭ خاس ئىسىملىرىدىكى ئۇيغۇرچە پۇراقنى يوقىتىش تەدبىرلىرى بىلەن پاراللېل يوسۇندا ئىجرا بولماقتا ئىكەن.

خىتاي باشقۇرۇشىدىكى «ئاقتۇ خەۋەر تورى» نىڭ 18-ئىيۇندىكى خەۋىرىگە قارىغاندا، ئەنە شۇ خىلدىكى نامى ئۆزگەرتىلگەن كەنتلەرنىڭ بىرى ئاقتۇ ناھىيىسىگە قاراشلىق تاركېچىك كەنتى بولۇپ، ئۇنىڭ نامى «خوڭشىن» دەپ ئۆزگەرتىلگەن. شۇنىڭدەك تۆۋەنگە چۈشكەن خىزمەت گۇرۇپپىسىنىڭ «يېقىندىن قوللاپ-قۇۋۋەتلىشى بىلەن يېڭى زامانغا لايىق سوتسىيالىستىك كەنتكە ئايلانغان.»

مەزكۇر خەۋەردە كۆرسىتىلىشىچە، بۇ كەنتتىكى «رەھبىرىي كادىرلار» نىڭ ئەڭ گەۋدىلىك خىزمەت نەتىجىلىرى شۇ يېزىدىكى دېھقانلارغا كەنت يىغىن زالىدا كۆپ قېتىملاپ ماركسىزملىق پەلسەپە، ئادەمنىڭ مايمۇندىن ئۆزگىرىشى، جۇڭخۇا مەدەنىيىتىنىڭ ئىزچىل داۋام قىلىشى، شى جىنپىڭ دەۋرىدىكى سوتسىيالىزم نەزەرىيىسى دېگەندەك تېمىلار بويىچە لېكسىيە بېرىش بولغان. شۇنىڭدەك مۇقىملىق تەشۋىقاتى ھەرقاچان بارلىق خىزمەتلەرنىڭ ئالدىغا قويۇلغان.

پائالىيەتچىلەر بۇ ھەقتە پىكىر قىلىپ، «خىتاي ھۆكۈمىتىنىڭ بۇ خىلدىكى يېزا-كەنت ناملىرىنى ‹ئىنقىلابى› ناملارغا ئۆزگەرتىشى ھەمدە دېھقانلارنىڭ تۇرمۇش قىيىنچىلىقىنى ھەل قىلىشقا ياردەملىشىش ئورنىغا ئۇلارنى سىياسىي ئۆگىنىشكە مەھكۇم قىلىشى سېپى ئۆزىدىن قىزىللاشقان ئاسسىمىلاتسىيەدۇر،» دەپ كۆرسەتتى.

پىكىرلەر (0)
Share
تولۇق بەت