Uyghur élide yéqin kelgüside 15 yilliq ma'arip omumlashturulidiken

Muxbirimiz jüme
2017-10-07
Élxet
Pikir
Share
Print

Xitay da'irilirining yéqini qararigha qarighanda, Uyghur élide yéqin kelgüside 15 yilliq ma'arip omumlashturulidiken. Bu 3 yilliq yesli, 9 yilliq mejburiy ma'arip we 3 yilliq toluq ottura ma'aripini öz ichige alidiken.

Shinxu'a agéntliqining 7-öktebir xewer qilishiche, mezkur uchurlar Uyghur aptonom rayonluq ma'arip nazariti élan qilghan bir tereqqiyat pilanida otturigha qoyulghan bolup, shundaq bolghanda atalmish "Qosh tilliq" mekteplerni püttürgen oqughuchilar bashqilargha qarighan 3 yil oshuq oquydiken.

Pilan'gha qarighanda, 2020-yiligha qeder Uyghur élidiki 98 pirsent bala 3 yilliq yesli ma'aripigha élinidiken, uningdin kéyin ular yene 9 yilliq mejburiy ma'arip boyiche terbiyilinidiken.

Xewerge qarighanda bularning yene 90 pirsenti dégüdek toluq otturigha chiqirilidiken.Halbuki, bu 90 pirsent oqughuchining peqet 40 pirsentila kespiy mektepler we bashqa uniwérsitét derijilik mekteplerge qobul qilinidiken.

Xewerde bularning ichidiki qalghan 60 pirsent oqughuchining 15 yilliq ma'aripni tamamlighandin kéyinki teqdiri heqqide héch nerse déyilmigen bolsimu, emma bu "Az sanliq millet oqughuchilirining xitayche yézish we sözleshning asasiy bilimlirini özleshtüridighan" liqi körsitilgen.

"Qosh tilliq ma'arip siyasiti" 2000-yilidin bashlap Uyghur élide mejburiy yolgha qoyulushqa bashlighan.

Da'iriler yene ötken bir nechche yildin étibaren Uyghur élide atalmish "Qosh til" ma'aripigha sélinidighan mebleghni hessilep köpeytken we jenubiy Uyghur élini asas qilghan halda yesli qurulushini tézletken idi.

Toluq bet