Уйғур ели даирилири интернетни тәқибләшни күчәйтиш үчүн хизмәтчи хадим қобул қилмақчи

Мухбиримиз ирадә
2016-12-29
Елхәт
Пикир
Share
Принт

29-Декабир күни, уйғур елиниң интернет бихәтәрликигә капаләтлик қилиш вә тордики мәзмунларни контрол қилиш хизмити билән шуғуллинидиған «уйғур аптоном районлуқ интернет, учур-алақә идариси» 100 нәпәр хизмәтчи хадим қобул қилидиғанлиқи һәққидә уқтуруш тарқатқан.

Хитай һөкүмәт даирилири арқа-арқилап интернет ториға қаритилған башқурушни күчәйтишни қаттиқ тәкитләватқан бир мәзгилдә бу органға хизмәтчи хадим қобул қилиниши диққәт қозғиди.

Чүнки, тәңритағ хәвәрләр торида хитайчә тарқитилған уқтурушта «уйғур аптоном районлуқ интернет, учур-алақә идариси» тонуштуруп өтүлгән болуп, униңда мәзкур идарә «уйғур аптоном райониниң тор бихәтәрлики вә учурлаштуруш хизмәтлири, интернет-учур саһәсидики партийә қурулуши вә интернеттики учур мәзмунларни қанун бойичә көзитиш вә тәкшүрүшкә мәсул орган» дәп баян қилинған. Қобул қилинидиған хизмәтчи хадимларму мәзкур идарә қармиқидики интернет торидики җамаәт пикрини анализ қилиш мәркизи, көп хил тиллиқ интернет мулазимәт вә башқуруш мәркизи, интернет тори баһалаш мәркизи, учур вә мәлум қилиш мәркизи, интернет учур тәтқиқат мәркизи қатарлиқ 5 ишханиға қобул қилинидикән.

Хитайниң дөләтлик интернет-учур башқуруш ишханиси техи сәйшәнбә күни «дөләт интернет бихәтәрлики истратегийиси» намлиқ һөҗҗәтни елан қилип, интернеттики мәзмунларға қаритилған контролни күчәйтип дөләтниң бихәтәрликигә капаләтлик қилишни тәкитлигән иди. Чәтәлләрдики уйғур көзәткүчиләр юқиридики хизмәт еланиниң хитай һөкүмитиниң уйғур елидики интернет ториға қаратқан қамални ашуруш үчүн җиддий қошун һазирлаватқанлиқини мөлчәрлимәктә.

Пикирләр (0)
Share
Толуқ бәт