Uyghur éli da'iriliri intérnétni teqibleshni kücheytish üchün xizmetchi xadim qobul qilmaqchi

Muxbirimiz irade
2016-12-29
Élxet
Pikir
Share
Print

29-Dékabir küni, Uyghur élining intérnét bixeterlikige kapaletlik qilish we tordiki mezmunlarni kontrol qilish xizmiti bilen shughullinidighan "Uyghur aptonom rayonluq intérnét, uchur-alaqe idarisi" 100 neper xizmetchi xadim qobul qilidighanliqi heqqide uqturush tarqatqan.

Xitay hökümet da'iriliri arqa-arqilap intérnét torigha qaritilghan bashqurushni kücheytishni qattiq tekitlewatqan bir mezgilde bu organ'gha xizmetchi xadim qobul qilinishi diqqet qozghidi.

Chünki, tengritagh xewerler torida xitayche tarqitilghan uqturushta "Uyghur aptonom rayonluq intérnét, uchur-alaqe idarisi" tonushturup ötülgen bolup, uningda mezkur idare "Uyghur aptonom rayonining tor bixeterliki we uchurlashturush xizmetliri, intérnét-uchur sahesidiki partiye qurulushi we intérnéttiki uchur mezmunlarni qanun boyiche közitish we tekshürüshke mes'ul organ" dep bayan qilin'ghan. Qobul qilinidighan xizmetchi xadimlarmu mezkur idare qarmiqidiki intérnét toridiki jama'et pikrini analiz qilish merkizi, köp xil tilliq intérnét mulazimet we bashqurush merkizi, intérnét tori bahalash merkizi, uchur we melum qilish merkizi, intérnét uchur tetqiqat merkizi qatarliq 5 ishxanigha qobul qilinidiken.

Xitayning döletlik intérnét-uchur bashqurush ishxanisi téxi seyshenbe küni "Dölet intérnét bixeterliki istratégiyisi" namliq höjjetni élan qilip, intérnéttiki mezmunlargha qaritilghan kontrolni kücheytip döletning bixeterlikige kapaletlik qilishni tekitligen idi. Chet'ellerdiki Uyghur közetküchiler yuqiridiki xizmet élanining xitay hökümitining Uyghur élidiki intérnét torigha qaratqan qamalni ashurush üchün jiddiy qoshun hazirlawatqanliqini mölcherlimekte.

Toluq bet