Уйғур аптоном районлуқ партком иқтисад хизмәт йиғини чақирип, 2020-йиллиқ иқтисади орунлаштуруш елип барған

Мухбиримиз әркин
2019-12-18
Елхәт
Пикир
Share
Принт

Уйғур аптоном районлуқ партком 17‏-декабир күни иқтисади хизмәт йиғини чақирип, 2020‏-йили районниң уйғурларни районға йөткәп келингән хитай завут-карханилирида мәҗбурий әмгәккә селиш асасидики иқтисадий игилик шәклиниң давамлишидиғанлиқи тәкитләнгән. Хитай таратқулириниң хәвәр қилишичә, йиғинда бейҗиң иқтисад хизмити йиғининиң роһи йәткүзүлүп, һазирқи иқтисадий вәзийәт тәһлил қилинған, шундақла келәр йиллиқ иқтисади орунлаштуруш елип берилған.

Йиғинда «партийә мәркизий комитетиниң келәр йиллиқ иқтисад хизмити тоғрисидики тәдбир-орунлаштурмилириға маслишип, шинҗаң иқтисадиниң юқири сүпәтлик тәрәққиятиға түрткә болуш» тәкитләнгән. Көзәткүчиләрниң қәйт қилишичә, хитай таратқулиридики мәзкур йиғинға даир хәвәрләр компартийәниң бир қисим хитай завут карханилирини уйғур райониға йөткәп, уйғурларни бу карханиларда һәқсиз яки әрзан әмгәк күчи сүпитидә мәҗбурий әмгәккә селиш асасидики иқтисади игилик шәклиниң давамлишидиғанлиқини көрсәтмәктә икән.

«Шинҗаң гезити» ниң хәвиридә, йиғинда келәр йили давамлиқ «муқимлиқ, тәрәққият, хәлқ турмушидин ибарәт үчни бир гәвдә қилишта чиң туруп, ишқа орунлаштурушни күчәп муқимлаштуруп вә кеңәйтип, маарип ишлирини зор күч билән тәрәққий қилдуруп. . . . . . . . Иҗтимаий капаләт системисини мукәммәлләштүрүп, шәһәр-йеза әмин өй қурулушини йолға қоюп. . . . . . Бихәтәрлик системиси қурулушини йәниму күчәйтип, һәр милләт аммини. . . . . . . . Бихәтәрлик туйғусиға игә қилиш» тәкитлигәнлики илгири сүрүлгән.

Хитайниң 2017‏-йили башланған кәң көләмлик тутқунида лагерларға қамалған нурғун уйғур завут-карханиларға йөткәп келинип, районда мәҗбурий әмгәк асас қилинған бир хил игилик шәкилләндүрүлгән. Лекин, бу хил игилик хәлқараниң тәнқидигә учриған. Америка һөкүмити бу хил карханиларда ишләнгән бәзи мәһсулатларни чәклигән иди.

«Шинҗаң гезити» ниң билдүрүшичә, йиғинда йәнә хитай завут-карханилирини җәлп қилишни давамлиқ күчәйтиш тәкитлинип, «кәсипләр арқилиқ шинҗаңға ярдәм беришни пухта алға силҗитиш, түрлүк кархана вә җәмийәт капиталини пүтүн шинҗаң даирисидә мәбләғ селип кәсипләрни гүлләндүрүшкә риғбәтләндүрүш, йетәкләш; адил риқабәт муһити яритип, йеңичә һөкүмәт-содигәрләр мунасивити орнитиш, пуқрави игиликни зор күч билән тәрәққий қилдуруш» тәләп қилинған.

Пикирләр (0)
Share
Толуқ бәт