Уйғур аптоном район рәһбәрлириниң кадирларниң истилини яхшилашни қаттиқ тәкитлиши диққәт қозғимақта

Мухбиримиз ирадә
2017-01-25
Елхәт
Пикир
Share
Принт

Уйғур аптоном райониниң партком секретари чен чүәнго башлиқ рәһбәрлири нөвәттә җай-җайларда партийә интизамини вә кадирларниң истилини яхшилашни қаттиқ тәкитләп, уни муқимлиқниң капалити дәп көрсәтмәктә.

Тәңритағ торидин берилгән хәвәрләрдин қариғанда, уйғур аптоном районлуқ партком мәхсус «сөзни өгиниш, истилни өзгәртиш, әмәлийләштүрүшни чиң тутуш» паалийити башлашни бекиткән болуп, уйғур аптоном районниң рәиси шөһрәт закир қәшқәрдики мәзгилидә юқиридики бу һәрикәтни «истилни һәқиқий өзгәртиш, иҗтимаий муқимлиқни илгири сүрүштики муһим тәдбир» дәп тәриплигән.

У сөзидә йәнә, иҗтимаий муқимлиқ вә әбәдий әминлик баш нишаниниң ши җинпиңниң дөләт ичи вә хәлқара вәзийәткә асасән чиқарған муһим истратегийәлик һөкүм икәнликини әскәртип туруп, «идийиви көз қариши баш нишан билән бирдәк болмиғанлар идийисини қәтий түзитиш, истилни өзгәртиши керәк» дегән сөзләрни қилған.

Бундин илгири чен чүәнгому бир йиғинда қилған сөзидә истил мәсилисини тәкитләп «айрим җайларда бәзи кадирларниң баш нишанға болған тонуши йетәрлик әмәс, идийидә бихуд, истили турақсиз, күрәштин бизар» дегән иди. Чәтәлләрдики уйғур көзәткүчиләр уйғур елидә йеқиндин буян иҗра қилиниватқан бир қисим чекидин ашқан сиясәтләрниң бәзи хитай кадирларниму биарам қиливатқанлиқини, шуңа хитай рәһбәрлириниң истил мәсилисини күчәп тәкитләватқанлиқини билдүрди. Йеқинда, қәшқәр вилайити 20 дин ошуқ әмәлдарни қош тил маарипи хизмитигә болған көз қариши партийә билән бирдәк әмәс, вәзиписини иҗра қилмиди» дегән сәвәб болған әмилидин бошатқан.

Пикирләр (0)
Share
Толуқ бәт