Uyghur aptonom rayon rehberlirining kadirlarning istilini yaxshilashni qattiq tekitlishi diqqet qozghimaqta

Muxbirimiz irade
2017-01-25
Élxet
Pikir
Share
Print

Uyghur aptonom rayonining partkom sékrétari chén chüen'go bashliq rehberliri nöwette jay-jaylarda partiye intizamini we kadirlarning istilini yaxshilashni qattiq tekitlep, uni muqimliqning kapaliti dep körsetmekte.

Tengritagh toridin bérilgen xewerlerdin qarighanda, Uyghur aptonom rayonluq partkom mexsus "Sözni öginish, istilni özgertish, emeliyleshtürüshni ching tutush" pa'aliyiti bashlashni békitken bolup, Uyghur aptonom rayonning re'isi shöhret zakir qeshqerdiki mezgilide yuqiridiki bu heriketni "Istilni heqiqiy özgertish, ijtima'iy muqimliqni ilgiri sürüshtiki muhim tedbir" dep teripligen.

U sözide yene, ijtima'iy muqimliq we ebediy eminlik bash nishanining shi jinpingning dölet ichi we xelq'ara weziyetke asasen chiqarghan muhim istratégiyelik höküm ikenlikini eskertip turup, "Idiyiwi köz qarishi bash nishan bilen birdek bolmighanlar idiyisini qet'iy tüzitish, istilni özgertishi kérek" dégen sözlerni qilghan.

Bundin ilgiri chén chüen'gomu bir yighinda qilghan sözide istil mesilisini tekitlep "Ayrim jaylarda bezi kadirlarning bash nishan'gha bolghan tonushi yéterlik emes, idiyide bixud, istili turaqsiz, küreshtin bizar" dégen idi. Chet'ellerdiki Uyghur közetküchiler Uyghur élide yéqindin buyan ijra qiliniwatqan bir qisim chékidin ashqan siyasetlerning bezi xitay kadirlarnimu bi'aram qiliwatqanliqini, shunga xitay rehberlirining istil mesilisini küchep tekitlewatqanliqini bildürdi. Yéqinda, qeshqer wilayiti 20 din oshuq emeldarni qosh til ma'aripi xizmitige bolghan köz qarishi partiye bilen birdek emes, wezipisini ijra qilmidi" dégen seweb bolghan emilidin boshatqan.

Toluq bet