Уйғур елидики 3 нәпәр кадирға чириклик мәсилиси сәвәбидин уқтуруш елан қилинған

Мухбиримиз ирадә
2017-02-09
Елхәт
Пикир
Share
Принт

8-Феврал күни, хитай мәркизий интизам тәкшүрүш комитети уқтуруш елан қилип, уйғур елидики 3 нәпәр һөкүмәт әмәлдариға чириклик қилғанлиқи сәвәбидин партийидин чиқириш, еғир агаһландуруш бериш җазалири берилгәнликини билдүргән.

Уқтуруш мәзмуниға қариғанда, бу үчәйлән айрим-айрим һалда бортала шәһири сунинтоха кәнти партийә ячейкисиниң муавин партком секретари вә су тәқсим қилғучи кадири хе луң, куча наһийәси чимән базири тоққуз тома кәнти аһалиләр комитетиниң муавин мудири езиз бисар, биңтуәнгә қарашлиқ шихәнзә 148-туән хоҗилиқ понкитиниң муавин башлиқи йән лиң қатарлиқлар икән. Хәвәрдә бу кишиләрниң аммиға қалаймиқан селиқ салғанлиқи, мәсилән, хе луңниң вәзипә қулайлиқидин пайдилинип, өзи тапшурушқа тегишлик 4400 йүән су һәққини деһқанларға тәң чиқим қилдурғанлиқи, изиз бисарниң коллектипниң пулини шәхси ишиға ишләткәнлики, йән лиңниң йезидики намратларға берилидиған турмуш қутқузуш пулини ишлитивалғанлиқи баян қилинған.

Чәтәлләрдики уйғур көзәткүчиләр болса юқиридикиләрни уйғур елидики мәвҗут чириклик мәсилисиниң интайин кичиккинә бир қисми, деди вә уйғур елиниң юқириқидәк чириклик вәқәлири әң еғир җайлиқини билдүрди. Илгири радиомизға әһвал инкас қилған уйғур деһқанлар дөләт рәиси ши җинпиңниң чирикликкә қарши уруши қаттиқ тәшвиқ қилиниватқан болсиму, әмма чириклик қилмишлириниң йәң ичидә охшаш давам қиливатқанлиқини вә деһқанларниңму әһвални юқириға инкас қилиштин қорқидиғанлиқини, чүнки уларниң өзидин өч елишидин әнсирәйдиғанлиқини билдүргән иди.

Пикирләр (0)
Share
Толуқ бәт