Uyghur élidiki 3 neper kadirgha chiriklik mesilisi sewebidin uqturush élan qilin'ghan

Muxbirimiz irade
2017-02-09
Élxet
Pikir
Share
Print

8-Féwral küni, xitay merkiziy intizam tekshürüsh komitéti uqturush élan qilip, Uyghur élidiki 3 neper hökümet emeldarigha chiriklik qilghanliqi sewebidin partiyidin chiqirish, éghir agahlandurush bérish jazaliri bérilgenlikini bildürgen.

Uqturush mezmunigha qarighanda, bu ücheylen ayrim-ayrim halda bortala shehiri sunintoxa kenti partiye yachéykisining mu'awin partkom sékrétari we su teqsim qilghuchi kadiri xé lung, kucha nahiyesi chimen baziri toqquz toma kenti ahaliler komitétining mu'awin mudiri éziz bisar, bingtu'en'ge qarashliq shixenze 148-tu'en xojiliq ponkitining mu'awin bashliqi yen ling qatarliqlar iken. Xewerde bu kishilerning ammigha qalaymiqan séliq salghanliqi, mesilen, xé lungning wezipe qulayliqidin paydilinip, özi tapshurushqa tégishlik 4400 yüen su heqqini déhqanlargha teng chiqim qildurghanliqi, iziz bisarning kolléktipning pulini shexsi ishigha ishletkenliki, yen lingning yézidiki namratlargha bérilidighan turmush qutquzush pulini ishlitiwalghanliqi bayan qilin'ghan.

Chet'ellerdiki Uyghur közetküchiler bolsa yuqiridikilerni Uyghur élidiki mewjut chiriklik mesilisining intayin kichikkine bir qismi, dédi we Uyghur élining yuqiriqidek chiriklik weqeliri eng éghir jayliqini bildürdi. Ilgiri radi'omizgha ehwal inkas qilghan Uyghur déhqanlar dölet re'isi shi jinpingning chiriklikke qarshi urushi qattiq teshwiq qiliniwatqan bolsimu, emma chiriklik qilmishlirining yeng ichide oxshash dawam qiliwatqanliqini we déhqanlarningmu ehwalni yuqirigha inkas qilishtin qorqidighanliqini, chünki ularning özidin öch élishidin ensireydighanliqini bildürgen idi.

Toluq bet