Хитай даирилири 7 нәпәр уйғур әмәлдари үстидин тәкшүрүш елип беришқа башлиди

Мухбиримиз әркин
2017-02-10
Елхәт
Пикир
Share
Принт

Хитай интизам тәкшүрүш тармақлири бир уйғур маарип әмәлдари билән 6 нәпәр уйғур җ х кадири үстидин тәкшүрүш елип беришқа башлиғанлиқини елан қилди. Аптоном районлуқ интизам тәкшүрүш комитети пәйшәнбә күни елан қилған баянатида, бу кишиләрниң «интизамға еғир хилаплиқ» қилғанлиқини билдүргән. Әмма конкрет қандақ интизамға хилаплиқ қилғанлиқини тилға алмиған.

Бу 7 нәпәр кишиниң бири, уйғур аптоном районлуқ маарип назаритиниң сабиқ муавин партком секретари вә назири саттар давут. Җ х системисидики қалған 6нәпәр кадир хотән вилайәтлик сақчиниң муавин башлиқи ниҗат авудин, йәнә бир муавин башлиқи ели имин, хотән вилайәтлик алаһидә разведка әтритиниң башлиқи абдуқадир абдулла, хотән вилайәтлик сақчиниң сиясий комиссари ялқун абдуразақ, қарақаш наһийәлик сақчи идарисиниң сиясий комиссари абабәкри ели, хотән вилайәтлик сақчи идариси ички бихәтәрлик идарисиниң разведка хадими мухтәр турсун қатарлиқларни өз ичигә алған.

Бу, хотәндә қарақаш наһийәлик партком 2016‏-йили 28‏-декабир һуҗумға учрап, хотән вилайәтлик вә қарақаш наһийәлик партком секретарлири вәзиписидин елип ташланғандин кейин йүз бәргән йәнә бир қетимлиқ вәзиписидин елип ташлап тәкшүрүш вәқәсидур.

Лекин, бу кишиләрниң мәсилисиниң парихорлуқ яки сиясийға алақидар икәнлики мәлум әмәс. Аптоном районлуқ интизам тәкшүрүш комитети өткән йили маарип назаритиниң уйғур оттура мәктәп әдәбият дәрсликини түзүш саһәсидики нопузлуқ бир қанчә уйғур кадир вә зиялийни нәзәрбәнд астиға алған. Маарип назири саттар давутниң мәсилиси шуларға четишлиқ яки әмәслики мәлум әмәс.

Пикирләр (0)
Share
Толуқ бәт