Xitay da'iriliri 7 neper Uyghur emeldari üstidin tekshürüsh élip bérishqa bashlidi

Muxbirimiz erkin
2017-02-10
Élxet
Pikir
Share
Print

Xitay intizam tekshürüsh tarmaqliri bir Uyghur ma'arip emeldari bilen 6 neper Uyghur j x kadiri üstidin tekshürüsh élip bérishqa bashlighanliqini élan qildi. Aptonom rayonluq intizam tekshürüsh komitéti peyshenbe küni élan qilghan bayanatida, bu kishilerning "Intizamgha éghir xilapliq" qilghanliqini bildürgen. Emma konkrét qandaq intizamgha xilapliq qilghanliqini tilgha almighan.

Bu 7 neper kishining biri, Uyghur aptonom rayonluq ma'arip nazaritining sabiq mu'awin partkom sékrétari we naziri sattar dawut. J x sistémisidiki qalghan 6neper kadir xoten wilayetlik saqchining mu'awin bashliqi nijat awudin, yene bir mu'awin bashliqi éli imin, xoten wilayetlik alahide razwédka etritining bashliqi abduqadir abdulla, xoten wilayetlik saqchining siyasiy komissari yalqun abdurazaq, qaraqash nahiyelik saqchi idarisining siyasiy komissari ababekri éli, xoten wilayetlik saqchi idarisi ichki bixeterlik idarisining razwédka xadimi muxter tursun qatarliqlarni öz ichige alghan.

Bu, xotende qaraqash nahiyelik partkom 2016‏-yili 28‏-dékabir hujumgha uchrap, xoten wilayetlik we qaraqash nahiyelik partkom sékrétarliri wezipisidin élip tashlan'ghandin kéyin yüz bergen yene bir qétimliq wezipisidin élip tashlap tekshürüsh weqesidur.

Lékin, bu kishilerning mesilisining parixorluq yaki siyasiygha alaqidar ikenliki melum emes. Aptonom rayonluq intizam tekshürüsh komitéti ötken yili ma'arip nazaritining Uyghur ottura mektep edebiyat derslikini tüzüsh sahesidiki nopuzluq bir qanche Uyghur kadir we ziyaliyni nezerbend astigha alghan. Ma'arip naziri sattar dawutning mesilisi shulargha chétishliq yaki emesliki melum emes.

Toluq bet