Бу йилдин башлап уйғур районида һөкүмәт вә хәлқ башқурушидики мәктәпләргә оқуғучи елиш бир туташ башқурулидикән

Мухбиримиз әркин
2020-01-06
Елхәт
Пикир
Share
Принт

Бу йил уйғур аптоном районида хәлқ башқурушидики оттура-башланғуч мәктәпләргә оқуғучи қобул қилишта һөкүмәт башқурушидики мәктәпләр билән бир туташ тәстиқлаш вә бир туташ башқуруш йолға қоюлидикән.

Бу бәлгилимә уйғур аптоном районлуқ маарип назарити билән биңтуән маарип идарисиниң йеқинда чиқарған бир уқтурушида оттуриға қоюлған. Мәзкур уқтуруш хитай һөкүмитиниң уйғур районидики 500 миңдәк йәрлик милләт балилирини мәҗбурий «ятақлиқ мәктәпләр» гә орунлаштуруп, уларға қарита омумйүзлүк меңә ююш елип бериватқанлиқи, уларниң аилиси, ана тили, дини етиқади вә мәдәнийити билән болған беғини үзүп ташлиғанлиқи илгири сүрүлүватқан мәзгилдә елан қилинди.

Йеқинда «ню-йорк вақти гезити» хитай даирилириниң 2017‏-йилиғичә 497 миң балини «ятақлиқ мәктәпләр» гә орунлаштуруп болғанлиқини хәвәр қилған иди. Хәвәрдә йәнә хитайниң 2020‏-йилғичә хитай тилини райондики йәрлик милләт балилирида омумлаштуруш болушни пиланлаватқанлиқи илгири сүрүлгән.

Уйғур аптоном районлуқ һөкүмәт өткән җүмә күни ахбарат елан қилип, «ятақлиқ мәктәпләр» ни ақлиған. «ятақлиқ мәктәпләр ата-аниларниң йүкини зор дәриҗидә йеникләткәнлики» ни илгири сүргән иди. «Шинҗаң гезити» ниң 6‏-январ хәвәр қилишичә, уйғур аптоном районлуқ маарип назарити билән биңтуән маарип идарисиниң «хәлқ башқурушидики оттура-башланғуч мәктәпләргә оқуғучи қобул қилишни түзүмләштүрүш тоғрисидики уқтуруши» да қәйт қилинишичә, бу йилдин башлап хәлқ башқурушидики оттура-башланғуч мәктәпләргә оқуғучи қобул қилиш һөкүмәт башқурушидики мәктәпләр билән бир вақитта башлинидикән. Уқтурушта хәлқ башқурушидики мәктәпләргә оқуғучи қобул қилишниң наһийә, шәһәр вә вилайәтләр билән чәклинидиғанлиқи, оқуғучи қобул қилиш пиланини маарип назарити яки биңтуән маарип идариси тәстиқлайдиғанлиқини билдүргән.

Пикирләр (0)
Share
Толуқ бәт