Bu yildin bashlap Uyghur rayonida hökümet we xelq bashqurushidiki mekteplerge oqughuchi élish bir tutash bashqurulidiken

Muxbirimiz erkin
2020-01-06
Élxet
Pikir
Share
Print

Bu yil Uyghur aptonom rayonida xelq bashqurushidiki ottura-bashlan'ghuch mekteplerge oqughuchi qobul qilishta hökümet bashqurushidiki mektepler bilen bir tutash testiqlash we bir tutash bashqurush yolgha qoyulidiken.

Bu belgilime Uyghur aptonom rayonluq ma'arip nazariti bilen bingtu'en ma'arip idarisining yéqinda chiqarghan bir uqturushida otturigha qoyulghan. Mezkur uqturush xitay hökümitining Uyghur rayonidiki 500 mingdek yerlik millet balilirini mejburiy "Yataqliq mektepler" ge orunlashturup, ulargha qarita omumyüzlük ménge yuyush élip bériwatqanliqi, ularning a'ilisi, ana tili, dini étiqadi we medeniyiti bilen bolghan béghini üzüp tashlighanliqi ilgiri sürülüwatqan mezgilde élan qilindi.

Yéqinda "Nyu-york waqti géziti" xitay da'irilirining 2017‏-yilighiche 497 ming balini "Yataqliq mektepler" ge orunlashturup bolghanliqini xewer qilghan idi. Xewerde yene xitayning 2020‏-yilghiche xitay tilini rayondiki yerlik millet balilirida omumlashturush bolushni pilanlawatqanliqi ilgiri sürülgen.

Uyghur aptonom rayonluq hökümet ötken jüme küni axbarat élan qilip, "Yataqliq mektepler" ni aqlighan. "Yataqliq mektepler ata-anilarning yükini zor derijide yénikletkenliki" ni ilgiri sürgen idi. "Shinjang géziti" ning 6‏-yanwar xewer qilishiche, Uyghur aptonom rayonluq ma'arip nazariti bilen bingtu'en ma'arip idarisining "Xelq bashqurushidiki ottura-bashlan'ghuch mekteplerge oqughuchi qobul qilishni tüzümleshtürüsh toghrisidiki uqturushi" da qeyt qilinishiche, bu yildin bashlap xelq bashqurushidiki ottura-bashlan'ghuch mekteplerge oqughuchi qobul qilish hökümet bashqurushidiki mektepler bilen bir waqitta bashlinidiken. Uqturushta xelq bashqurushidiki mekteplerge oqughuchi qobul qilishning nahiye, sheher we wilayetler bilen cheklinidighanliqi, oqughuchi qobul qilish pilanini ma'arip nazariti yaki bingtu'en ma'arip idarisi testiqlaydighanliqini bildürgen.

Toluq bet