خىتاي دائىرىلىرى ئۇيغۇرلارنىڭ پاسپورت ۋە كىملىكىدىكى ئىسىم-فامىلىسىنى تەرتىپكە سالىدىكەن

مۇخبىرىمىز ئەركىن
2016-04-01
ئېلخەت
پىكىر
Share
پرىنت

خىتاي ھۆكۈمىتى بۇ يىل ئۇيغۇرلارنىڭ پاسپورت ۋە كىملىك گۇۋاھنامىسىدىكى ئىسىم فامىلىسىنى تەرتىپكە سېلىپ، ئۇنىڭ يېزىلىشى بىلەن ئوقۇلۇشىنى، خىتايچىسى بىلەن ئۇيغۇرچىسىنى بىرلىككە كەلتۈرىدىغانلىقىنى بىلدۈرگەن.

«ئاسىيا كىندىكى» گېزىتىنىڭ ئىلگىرى سۈرۈشىچە، بۇ خىتاي ھۆكۈمىتى بۇ يىل ئۇيغۇر ئاپتونوم رايونىدا ئەمەلىيلەشتۈرىدىغان 20 تۈرلۈك كونكرېت تەدبىرنىڭ بىر قىسمىكەن. خەۋەردە، ئۇيغۇرلارنىڭ پاسپورت، كىملىك قاتارلىق گۇۋاھنامىلىرىدە، ئىسىم-فامىلىسى ئاھاڭداش بولسىمۇ، يېزىلىشى پەرقلىق بولۇش، ئىسىم-فامىلىسىنى ئارتۇق ياكى كەمتۈك يېزىش، فامىلە بىلەن ئىسىمنىڭ ئورنىنى ئالماشتۇرۇپ قويۇش، ئىسىم-فامىلىسىنى ئىزچىل بىر خىل خەت بىلەن يازماسلىق قاتارلىق ئەھۋاللار ھەر مىللەت ئاممىسىغا نۇرغۇن قۇلايسىزلىقلارنى ئېلىپ كەلگەنلىكىنى بىلدۈرگەن.

خىتاي ج خ دائىرىلىرىنىڭ ئۇيغۇرلارغا پاسپورت ئىشلىگەندە ئۇلارنىڭ ئىسمى بىلەن فامىلىسىنى ئالماشتۇرۇپ، فامىلە ئورنىغا ئىسمىنى يېزىش، تەلەپپۇزىنى خىتايچىغا ئۆزگەرتىش ئەھۋالى ئۇيغۇرلارنىڭ ئىزچىل نارازىلىقىنى قوزغاپ كەلگەن.

ئۇيغۇر پائالىيەتچىلەر، خىتاي دائىرىلىرىنى ئۇيغۇرلارنىڭ ئىسىم-فامىلىسىنى توغرا يېزىش قائىدىسىگە بۇزغۇنچىلىق قىلىش بىلەن ئەيىبلىگەن ئىدى. «ئاسىيا كىندىكى» گېزىتىنىڭ خەۋىرىدە قەيت قىلىشىچە، دائىرىلەر بۇ يىل بانكا، ئىجتىمائىي پاراۋانلىق، داۋالىنىش قاتارلىق ساھەلەردە ئۆلچەمنى بىرلىككە كەلتۈرۈپ، پاسپورت ۋە 2‏-ئەۋلاد كىملىكىنى ھەقسىز ئالماشتۇرۇپ بېرىدىكەن.

ئۇيغۇر ئاپتونوم رايونلۇق پارتكوم يېقىندا «مىللەتلەر ئىتتىپاقلىقى يىلى» سەپەرۋەرلىك يىغىنى چاقىرتىپ، 20 تۈرلۈك تەدبىر ئېلان قىلغان. ئۇيغۇرلارغا يولغا قويۇلغان «يېشىل كارت» تۈزۈمىنى بىكار قىلىش شۇ تەدبىرلەرنىڭ بىرى ئىدى.

ئەمما ئۇيغۇر پائالىيەتچىلىرىنىڭ قەيت قىلىشىچە، بۇ تەدبىرلەر ۋەزىيەتنى بىر مەزگىللىك كونترول قىلىشقا يارايدىغان تاكتىكىلىق تەدبىرلەر بولۇپ، ئۇ، ئۇيغۇرلارنىڭ سىياسىي ھوقۇقىغا دائىر نېگىزلىك مەسىلىنى ھەل قىلمايدۇ.

پىكىرلەر (0)
Share
تولۇق بەت