Хитай һөкүмитиниң рамизан һарписида икки уйғур кадирни җазалиши хәлқараниң диққитини қозғиди

Мухбиримиз әзиз
2016-06-01
Елхәт
Пикир
Share
Принт

Б б с ниң 1-июндики хитайчә хәвиридә вә ройтерис агентлиқиниң шу күнки хәвиридә ейтилишичә, ақсу вилайәтлик оттура сот мәһкимиси сиясий бөлүминиң сабиқ муавин мудири вә содийәси полат чавар «террор гумандарлириға йеник җаза һөкүм қилған», «сот мәһкимисиниң сот һөкүмини өз мәйличә өзгәрткән» дегәндәк җинайәтләр билән вәзиписидин қалдурулған һәмдә партийидин чиқирилған.

Ақсу вилайәтлик интизам тәкшүрүш комитетиниң бу һәқтики уқтурушида «полат чавар компартийә әзаси вә сот хадими туруп ‹үч хил күчләр' вә террорчиларға қаттиқ зәрбә бериш мәсилисидә сиясий мәйдани мустәһкәм болмиған, позитсийәдә қаттиқ болмиған» дейилгән.

Шуниң билән бир вақитта радиомиз хитай бөлүминиң игилишичә, ақсу вилайәтлик орманчилиқ идариси көкәртиш ишханисиниң сабиқ муавин мудири өмәрҗан һәсән «интизамға хилаплиқ қилиш» сәвәбидин партийидин чиқирилған вә хизмәттин һәйдәлгән. Ақсу вилайәтлик интизам тәкшүрүш комитетиниң уқтурушида «өмәрҗан һәсән партийә әзаси туруп һәрқайси мәтбуат орунлирида шинҗаңниң тарихини бурмилаш, җәмийәткә зиянлиқ учурларни тарқитиш, партийиниң вә һөкүмәтниң образини хунүкләштүрүш, дөләтниң бирликигә бузғунчилиқ қилиш, милләтләр иттипақлиқи вә иҗтимаий муқимлиққа зиян селиш мәзмунидики көплигән язмиларни елан қилғанлиқи һәмдә өзиниң партийивиликини йоқатқанлиқи » үчүн юқириқидәк җаза берилгәнлики қәйт қилинған.

Дуня уйғур қурултийиниң баянатчиси дилшат решит 1-июн күни радийомиз хитай бөлүминиң зияритини қобул қилип, хитайниң бу икки кишигә җаза бериши әмәлийәттә уйғурларға һәйвә көрситишни мәқсәт қилидиғанлиқини көрсәткән. У бу һәқтә тохтилип «полат чаварниң сот тәртипидә қанун бойичә иш көрүштин башқа һечқандақ хаталиқи йоқ, өмәрҗан болса асасий қанундики пуқраларға берилгән һоқуқлар бойичә өз пикрини ипадиләп, хитайниң ‹шинҗаң әзәлдин хитайниң бир қисми' дәйдиған сәпсәтисигә қарши мақалиләр язған. Хитай болса буларни өз нопузиға хирис қилғанлиқ дәп қарайду » дегән.

Пикирләр (0)
Share
Толуқ бәт