Хитай һөкүмитиниң уйғур елидә әдлийә-қанун саһәсигә көпләп адәм қобул қилиши диққәт қозғимақта

Мухбиримиз ирадә
2020-05-28
Елхәт
Пикир
Share
Принт

«Байинғолин гезити» тарқатқан хәвәрдин мәлум болушичә, йеқинда корла шәһәрлик хәлқ сот мәһкимиси 71 нәпәр йеңи заседателни вәзипигә тәйинлигән. Бу засетателлар вәзипә тапшурувелиш мурасимда қәсәм берип вәзипигә олтурған.

Йеңидин тәйинләнгән заседатиллар өмикидикиләр асасий қатламда хизмәт қилип, түрлүк зиддийәтләрни һәл қилишқа орунлаштурулған болуп, уларниң сотчиларни әмгәк маҗираси, давалаш саһәлиридики маҗиралар вә башқа делоларни бир тәрәп қилишиға ярдәм бериши тәләп қилинған.

Хәвәргә қариғанда, қәсәм бериш мурасимидин кейин шәһәрлик сот мәһкимиси 71 йеңи заседателни тәрбийәлигән.

Уйғур аптоном районлуқ даириләрниң йеқиндин буян һәрқайси вилайәт вә областлардики қанун-әдлийә органлириға көпләп адәм қобул қилиши диққәт қозғимақта. Чүнки хитай һөкүмитиниң уйғур елидә 3 милйондин артуқ кишини һечқандақ қануний асаси болмиған һалда тутуп туруши хәлқара җәмийәтниң күчлүк наразилиқини қозғиған иди. Шу сәвәбтин хитай һөкүмити йеқиндин буян тактикисини өзгәртип, лагердикиләрни түркүм-түркүмләп сотлаш, уларға аталмиш қануний җәрянлар билән һөкүм елан қиливатқан көрүнүш һасил қилишқа урунуватқанлиқи ашкариланған иди.

Чәтәлләрдики уйғур көзәткүчиләр юқириқи бу заседателларниң лагердикиләрни бир тәрәп қилишта сот орунлиридики адәм күчини толуқлаш үчүн қобул қилинған болуши мумкинликини пәрәз қилишмақта.

Йеқинда йәнә хитайдики һөкүмәт тор бәтлири бейҗиңда ечиливатқан икки қурултай мәзгилидә уйғур елидин барған «икки қурултай вәкиллири» ниң хитайниң җаза һөкүм қануни вә түрмә қанунлирида өзгәртиш елип беришни тәләп қилғанлиқини хәвәр қилип, күчлүк диққәт қозғиған иди.

Пикирләр (0)
Share
Толуқ бәт