Хитайниң өктәбирдики «икки байрими» мәзгилидә уйғур дияри 15 милйон адәм қетим саяһәтчи күтүвалған

Мухбиримиз әркин
2020-10-09
Елхәт
Пикир
Share
Принт

Хитайниң 1-өктәбирдин 8-өктәбиргичә давамлашқан «дөләт байрими» вә «айтоқач байрими» мәзгилидә уйғур дияри 15 милйон адәм қетим саяһәтчи күтүвалған. Уйғур аптоном районлуқ мәдәнийәт назаритиниң хитай таратқулириға билдүрүшичә, буниң 1 милйон 428 миңи ичкиридин кәлгән хитай саяһәтчиләр икән. Мәдәнийәт назарити «тәңритағ» ториға бәргән учурида, уйғур дияри бу йил «икки байрам» мәзгилидә күтүвалған саяһәтчиниң өткән йилқидин 10. 78 Пирсәнт артқанлиқини илгири сүргән.

Лекин көзәткүчиләрниң тәкитлишичә, хитай һөкүмити уйғурларни дәпсәндә қилиш сәвәблик американиң имбаргосиға учрап, иқтисади касатлишиватқан уйғур дияриға қарита «сиясий мәқсәтлик саяһәт» ни йолға қоймақта икән. Вәзийәттин хәвәрдар затлар, уйғур дияриниң ичи-сиртидики идарә-җәмийәтләрниң ишчи-хизмәтчилирини байрам вә тәтил мәзгиллиридә тәшкиллик вә пиланлиқ саяһәткә уюштуруватқанлиқини билдүрмәктә.

Уларниң тәкитлишичә, һөкүмәтниң мәқсити бу арқилиқ касатлишиватқан иқтисадқа яр-йөләк болуп, дуняға вә хитай җәмийитигә «шинҗаң тинч-аман җай» дегән сигнал бериш, райондики хитай карханилири вә пуқралирини хатирҗәм қилиш икән. Америка һөкүмитиниң йеқиндин бери арқа-арқидин қанун-бәлгилимә чиқирип, райондики бир қисим хитай дөләт аппаратлириға, шәхс вә ширкәтләргә ембарго йүргүзүши райондики хитай карханилири вә пуқралирида қаттиқ әндишә қозғиған. «Тәңритағ» ниң хәвиридә тәкитлишичә, «икки байрам» мәзгилидә саяһәт нуқтилиқ шималдики саяһәт орунлириға орунлаштурулған.

Пикирләр (0)
Share
Толуқ бәт