Uyghur rayonidiki "Kespiy maharet merkezliri" namidiki orunlarda parixorluq yüz bériwatqanliqi ashkarilandi

Muxbirimiz erkin
2019-08-30
Élxet
Pikir
Share
Print

Xitay hökümiti 2 milyondek Uyghur, qazaq qatarliq musulman xelqni lagérlargha qamap, bu orunlarni xelq'aragha "Kespiy terbiyilesh merkezliri" dep körsitip kéliwatqanidi. Xitay taratqulirining 29‏-awghusttiki xewerliride ashkarilishiche, nöwette xitay hökümiti "Kespiy terbiyilesh merkezliri" dep kéliwatqan bu orunlarda parixorluq ewj élishqa bashlighan. Bu heqtiki xewerlerde, bu merkezler xitayning kishilik hoquqni depsende qilishigha ishtirak qiliwatqan shirketlerning pul tépish kozurigha aylinip qalghanliqi, ularning bu merkezlerdiki "Oqughuchi" sanini yuqirigha yalghan melum qilip, téximu köp yardem puli éliwatqanliqi ilgiri sürülmekte. "Shinjang géziti" ning 29‏-awghust xewiride ashkarilinishiche, nöwette Uyghur aptonom rayonluq adem küchi we ijtima'iy parawanliq nazariti "Kespiy terbiyilesh merkezliri" diki bu xil parixorluq xahishlirining tekshürüshke bashlap, saxtipezlik qilghan 42 orunning "Kespiy terbiye" élip bérish salahiyitini bikar qilghan. Aptonom rayonluq adem küchi bayliqi we ijtima'iy parawanliq nazaritining song famililik bir emeldari, nöwette bashqurushni uchurlashturush arqiliq bu ehwalning ünümlük aldini alghanliqini bildürgen.

"Shinjang géziti" ning bildürüshiche, "Shinjang sichu'ang éléktronluq téxnika cheklik shirkiti" qeshqer shehiridiki shénjén sana'et baghchisida "Kespiy terbiyilesh merkizi" qurup, atalmish "Oqughuchilar" gha kespiy we qanun terbiyisi élip bériwatqan ene shundaq shirketlerning biri iken. Mezkur shirketning diréktori xu shyenjü 28‏-awghust küni "Shinjang géziti" ning muxbirigha alaqidar organlarning yéteklishi bilen yéqinda 10 neper "Terbiyilesh oqutquchisi" qobul qilghanliqini bildürgen. Nöwette, amérika dölet mejlisidiki bezi ezalar tramp hökümitining Uyghur rayonida kishilik hoquqni depsende qiliwatqan xitay emeldarlirigha we uninggha yardemlishiwatqan xitay karxanilirigha émbargo qoyushini telep qilmaqta.

Toluq bet