Уйғур районида бу йилниң дәсләпки 8 ейида «мәркәзниң 8 хил бәлгилимиси» гә хилаплиқ қилған 839 кадир бир тәрәп қилинған

Мухбиримиз әркин
2019-09-13
Елхәт
Пикир
Share
Принт

Уйғур аптоном районида бу йилниң дәсләпки 8 ейида «мәркәзниң 8 хил бәлгилимиси» гә хилаплиқ қилған, дегән сәвәб билән 839 нәпәр кадир бир тәрәп қилинип, 661 кадирға интизам вә мәмурий җаза берилгән. «Шинҗаң гезити» ниң 13‏-сентәбир хәвәр қилишичә, уйғур аптоном районидики интизам тәкшүрүш вә ревизийә тармақлири бу мәзгил ичидә «мәркәзниң 8 хил бәлгилимиси» гә хилап 774 делони ениқлап чиққан. юқириқи кишиләр бу 774 делоға четишлиқ икән. Хитай рәиси ши җинпиң һакимийәт бешиға чиққандин кейин черикликкә қарши туруш һәрикити қозғап, түзүмгә хилап йәп-ичиш, түзүмгә хилап соға-салам елиш, һөкүмәт әшялирини түзүмигә хилап ишлитишни өз ичигә алған 8 хил бәлгилимә чиқарған. Бу һәрикәт уйғур районида йеқинқи икки йил ичидә нурғун йәрлик кадирларниң җазалинишиға сәвәб болған.

Чәтәлдики уйғур паалийәтчиләр юқириқи 8 хил бәлгилимә хитайниң уйғур районидики сияситигә йошурун қарши турған яки уни актип қоллимиған уйғур кадирлирини җазалашниң баһанисигә айлинип қалғанлиқини илгири сүрүп кәлгәниди. Мәзкур районда йеқинқи икки йил ичидә 8 хил бәлгилимигә хилаплиқ қилиш билән әйиблинип җазаланғанлар ават наһийилик 1‏-оттура мәктәпниң мудири һөригүл давут, хотән шәһири нарбағ иҗтимаий райониниң башлиқи розиниса һошур, гуман наһийиси пишна йезилиқ сәһийә орниниң башлиқи мәмтимин әхмәт, қаримай шәһәрлик миллий-диний ишлар комитетиниң хадими лутпулла һаҗи қатарлиқ нурғун йәрлик кадирларни өз ичигә алғаниди. 

«Шинҗаң гезити» ниң ашкарилишичә, уйғур аптоном районлуқ интизам тәкшүрүш вә ревизийә комитети 9‏-сентәбир күни мәзкур бәлгилимигә хилаплиқ қилған йәнә 8 типик делони елан қилған. Бу 8 типик делода ават наһийилик 1‏-оттура мәктәпниң мудири һөригүл давут, хотән шәһири нарбағ иҗтимаий райониниң башлиқи розиниса һошурниң исми тилға елинған. Һөригүл давут қурбан һейтлиқ соға қобул қилиш, розиниса һошур қурбан башқиларниң бәргән безәк буюми, қол саити қатарлиқ совғилирини елиш билән әйибләнгән.

Пикирләр (0)
Share
Толуқ бәт