Даириләр уйғур районидики ишләпчиқиришниң юқумниң алдини елиш вә контрол қилиш тәдбирлири асасида әслигә кәлтүргәнликини тәшвиқ қилмақта

Мухбиримиз ирадә
2020-04-02
Елхәт
Пикир
Share
Принт

Уйғур районлуқ даириләр һәдәп райондики ишләпчиқиришниң юқумниң алдини елиш вә контрол қилиш тәдбирлири асасида әслигә кәлтүргәнликини тәшвиқ қилмақта.

Хитайниң һөкүмәт таратқулириниң бүгүн тарқатқан бир хәвиридә куча наһийәсидики бир тоқумичилиқ завутини мисалға елип туруп, райондики ишләпчиқиришниң сәһийә өлчәмлиригә мас һалда әслигә кәлтүрүлгәнликини баян қилған.

Хәвәрдә мундақ дейилгән: «1-апрел күни шинҗаң йипәк йоли җинтоң тоқумичилиқ чәклик ширкитиниң ишләпчиқириш линийәси ғоңулдиди. . . Завут райони, сех вә үскүниләр пүтүнләй дезинфексийә қилинған, хизмәтчиләрниң бәдән температуриси өлчәнгән вә маска тарқитилған, юқумниң алдини елиш бихәтәрликигә капаләтлик қилиш алдинқи шәрти билән нормал ишләпчиқириш тәртиплик әслигә кәлтүрүлгән бир мәнзирә шәкилләнди.»

Хәвәрдә бир қанчә уйғур ишчиниң сөзлиридин нәқил елинған болуп, улар завутниң маска, пәләй тарқитип бериливатқанлиқини, бәдән темпиратурасини өлчәп туридиғанлиқи, өзлирини сехта наһайити бихәтәр һес қилидиғанлиқини ейтқан.

Йеқиндин буян уйғур елидин түркүмлигән әмгәк күчлириниң юқум әһвали интайин еғир хитай өлкилиригә ишләпчиқиришни әслигә кәлтүрүш үчүн әвәтилиши хәлқараниң күчлүк диққитини қозғиған. Нурғун хәлқаралиқ мәтбуатларниң бу һәқтики хәвәрлиридә хитай һөкүмитиниң уйғур әмгәк күчлирини кризис мәзгилидә хитай иқтисадини қутулдуруп қелиш йолида қурбан қиливатқанлиқини тәнқид қилған иди.

Һалбуки, «хитай күндилик гезити» бүгүн елан қилған хәвиридә юқумни контрол қилиш билән бихәтәр ишләпчиқиришни тәң елип барғили болидиғанлиқини қайта-қайта тәкитлигән.

Пикирләр (0)
Share
Толуқ бәт