Uyghur élide düshenbe küni korona wirusida yuqumlan'ghanlar 296 ge yetken

Muxbirimiz erkin
2020-11-02
Élxet
Pikir
Share
Print

24-Öktebir qeshqer wilayitining kona sheher nahiyesi zemin yézisining 3-kéntidiki 17 yashliq bir qizda bayqalghan korona wirusida yuqumlan'ghanlar, 1-noyabir küni 296 ge yétip barghan. Amérikadiki "Kabélliq xewerler tori" CNNning bildürüshiche, rayonda partlighan korona wirus bu yil yaz ayliridin béri xitayda yüz bergen eng chong yuqum weqesi bolup, xitayning qattiq kontrolluqi astidiki bu rayonda 1-noyabir küni yene 13 neper yéngi yuqumdar bayqalghan. Qeshqerning zemin yézisidiki bir kiyim-kéchek karxanisining ishchisida bayqalghan yuqum közetküchilerde wirus emgek lagérlirigha tarqaldimu?dégen so'al peyda qilghanidi.

CNN Ning "Xelq géziti" ning xewirini neqil keltürüshiche, yerlik da'iriler 1-noyabir küni axbarat yighini ötküzüp, yéngi bayqalghan yuqumdarlarning hemmisining kona sheher nahiyesidiki karantin astidiki kishiler ichidin bayqalghanliqi we hemmiside késellik alamiti yoqliqini bildürgen. Buning bilen Uyghur élide resmiy yuqumdarlar 59 gha, késellik alamiti yoq yuqumdarlar 236 ge yétip barghan. Nöwette késellik alamiti yoq bir qisim yuqumdarlar qizilsu oblastining aqtu nahiyesidimu bayqalghan.

Xitay sehiye da'irilirining bildürüshiche, yerlik da'iriler 1-noyabirdin bashlap qeshqer shehiride 3-qétimliq yadro kislatasi arqiliq tekshürüshni bashlighan bolup, 2-noyabir küni 778 ming kishini tekshürüp bolghan. Da'iriler téxi ötken heptide 2-qétimliq yadro kislatasi bilen tekshürüshi élip barghanidi. Nöwette, wirusning zemin yézisining 3-kentidiki 17 yashliq ishchi qizgha qeyerdin yuqqanliqi melum emes. Da'iriler uchurni qattiq kontrol qilip, yuqum menbesi we yuqumdar qizning hazirqi ehwali heqqide héchqandaq uchur bérip baqmidi.

Toluq bet