Хитай даирилири уйғур елидә корона вируси билән юқумлинишниң тохтиғанлиқини елан қилди

Мухбиримиз әркин
2020-11-09
Елхәт
Пикир
Share
Принт

Хитай даирилири уйғур елидә корона вируси юқумдарлириниң байқилишиниң тохтиғанлиқи, 8-ноябир күни районда һечқандақ юқумдар байқалмиғанлиқини елан қилған.

Шинхуа агентлиқиниң 9-ноябир хәвәр қилишичә, уйғур аптоном районлуқ сәһийә комитети йәкшәнбә күни районда кесәллик аламити йоқ юқумдар байқалмиғанлиқини билдүргән. Бу хитай сәһийә даирилириниң тунҗи юқум 24-өктәбир қәшқәрниң конашәһәр наһийәси зәмин йезисидики бир карханида ишләйдиған 17 яшлиқ бир қизда байқалған 2 һәптидин бери тунҗи қетим юқумдар байқалмиғанлиқини елан қилишидур.

Лекин көзәткүчиләр хитайниң райондики юқум әһвалиға даир санлиқ мәлуматлириға изчил гуман билән қарап кәлгән. Шинхуа агентлиқи буниңдин бир күн илгири, йәни 7-ноябир күни қәшқәрдә икки нәпәр кесәллик аламити йоқ юқумдар байқалғанлиқи, юқумдарларниң карантинға елинғанлиқини билдүргән. Мәзкур ахбарат агентлиқиниң тәкитлишичә, даириләр 8-ноябир йәкшәнбә күни райондики рәсмий юқумдарларни 59 нәпәр, кесәллик аламити йоқ юқумдарларни 306 нәпәр, дәп елан қилған.

Сәһийә даирилириниң тәкитлишичә, рәсмий юқумдарларниң һәммиси қәшқәрдә, кесәллик аламити йоқ юқумдарлар қәшқәр билән қизилсуда икән. Буниң алдида хитайниң муавин баш министири сун чүнлән қашқәр билән қизилсуни зиярәт қилип, районда юқумға қарши җиддий тәдбирләр елинған болсиму, лекин юқум вәзийитиниң йәнила «кәскин» икәнлики, юқумға қарши «уруш һалити» ни давамлиқ сақлашни тәләп қилған иди.

Пикирләр (0)
Share
Толуқ бәт