Хитай дөләт мудапиә министири уйғурлар дияридики муқимлиқни ашуридиғанлиқини билдүрди

Мухбиримиз әзиз
2018-01-30
Елхәт
Пикир
Share
Принт

Хитай һөкүмәт тармақлири «муқимлиқни сақлаш» намида уйғурлар диярида түрлүк чекидин ашқан тәдбирләрни қоллинип келиватқанлиқи мәлум. Йеқинда хитайниң дөләт мудапиә министири чаң вәнчуән уйғурлар дияридики чегра мудапиә хизмитини көздин кәчүрүп қайтқандин кейин «шинҗаңниң муқимлиқини қәтий сақлаш лазим» дегән мавзуда сөз қилған. Шуниңдәк армийиниң хәлқ билән бир гәвдә болуп, чегра районни қоғдиши һәмдә бу җайда «төмүр сепил» бәрпа қилишни тәкитлигән.

Хитай һөкүмити башқурушидики «йәр шари вақти гезити» ниң 30-январдики хәвиридә ейтилишичә, чаң вәнчуән уйғурлар диярида чегра қаравулханилири, сақчи понкитлири, тәкшүрүш понкитлири вә башқа алақидар әслиһәләрни көздин кәчүргән. Шуниңдәк бу җәрянда «мәркизий һөкүмәт шинҗаңда узун мәзгиллик муқимлиқ орнитишни хизмәт нишанлириниң бири қилип бекитти» дегән мәзмунда мәлуматлар бәргән. Мәзкур гезитниң хәвиридә ейтилишичә, чаң вәнчуәнниң зиярити хитай мәркизий һөкүмитиниң уйғурлар дияридики муқимлиққа алаһидә көңүл бөлүватқанлиқини көрсәтсиму, мәзкур җайниң вәзийитиниң яманлашқанлиқиниң бешарити әмәс икән.

Мәлум болушичә, уйғурлар диярида нөвәттә террорлуққа қарши мәзмундики идеологийә тәшвиқати әвҗ еливатқан болуп, 16-январдики йиғинда уйғур аптоном районлуқ һөкүмәт бу йиллиқ хизмәтниң давамлиқ һалда идеологийә саһәсигә мәркәзлишидиғанлиқини җакарлиған. Шуниңдәк «барлиқ саһәләрдики зиянлиқ идеологийилик тәсирни сүпүрүп ташлаш» һәмдә «барлиқ икки йүзлимичи кадирларни байқаш» лазимлиқини тәкитлигән.

Пикирләр (0)
Share
Толуқ бәт