Xitay dölet mudapi'e ministiri Uyghurlar diyaridiki muqimliqni ashuridighanliqini bildürdi

Muxbirimiz eziz
2018-01-30
Élxet
Pikir
Share
Print

Xitay hökümet tarmaqliri "Muqimliqni saqlash" namida Uyghurlar diyarida türlük chékidin ashqan tedbirlerni qollinip kéliwatqanliqi melum. Yéqinda xitayning dölet mudapi'e ministiri chang wenchu'en Uyghurlar diyaridiki chégra mudapi'e xizmitini közdin kechürüp qaytqandin kéyin "Shinjangning muqimliqini qet'iy saqlash lazim" dégen mawzuda söz qilghan. Shuningdek armiyining xelq bilen bir gewde bolup, chégra rayonni qoghdishi hemde bu jayda "Tömür sépil" berpa qilishni tekitligen.

Xitay hökümiti bashqurushidiki "Yer shari waqti géziti" ning 30-yanwardiki xewiride éytilishiche, chang wenchu'en Uyghurlar diyarida chégra qarawulxaniliri, saqchi ponkitliri, tekshürüsh ponkitliri we bashqa alaqidar eslihelerni közdin kechürgen. Shuningdek bu jeryanda "Merkiziy hökümet shinjangda uzun mezgillik muqimliq ornitishni xizmet nishanlirining biri qilip békitti" dégen mezmunda melumatlar bergen. Mezkur gézitning xewiride éytilishiche, chang wenchu'enning ziyariti xitay merkiziy hökümitining Uyghurlar diyaridiki muqimliqqa alahide köngül bölüwatqanliqini körsetsimu, mezkur jayning weziyitining yamanlashqanliqining béshariti emes iken.

Melum bolushiche, Uyghurlar diyarida nöwette térrorluqqa qarshi mezmundiki idé'ologiye teshwiqati ewj éliwatqan bolup, 16-yanwardiki yighinda Uyghur aptonom rayonluq hökümet bu yilliq xizmetning dawamliq halda idé'ologiye sahesige merkezlishidighanliqini jakarlighan. Shuningdek "Barliq sahelerdiki ziyanliq idé'ologiyilik tesirni süpürüp tashlash" hemde "Barliq ikki yüzlimichi kadirlarni bayqash" lazimliqini tekitligen.

Toluq bet