Хитай һөкүмити уйғур елиға хитай өлкилиридин «ихтисаслиқ хадим» йөткәш салмиқини зорайтидикән

Мухбиримиз ирадә
2017-03-30
Елхәт
Пикир
Share
Принт

Хитай һөкүмитиниң «ихтисаслиқ хадим» намида техиму көп хитай яшлирини уйғур елиға йөткәп ишқа орунлаштуридиғанлиқи мәлум болмақта.

Хитайниң «хәлқ тори» ниң 30- март күни тарқатқан хәвиридә ейтилишичә, уйғур аптоном районлуқ адәм күчи байлиқи вә иҗтимаий капаләт назарити кәлгүси нәччә йилда «ихтисаслиқларни җәлп қилип, ақилларни киргүзүш» дегән сияситигә асасән юқири мааш бериш, мукапатлаш, йешил йол ечиш қатарлиқ тәдбирләр арқилиқ хитай өлкилиридики «ихтисаслиқлар» ни уйғур елиға йөткәш салмиқини ашуридикән.

Буниңдин сирт, уйғур район даирилири йәнә «аптоном районниң юқири қатлими җиддий еһтияҗлиқ ихтисас игисини киргүзүш қурулуши» намлиқ түрниму йолға қойидикән. Хәвәрдә бу түр һәққидә мундақ дейилгән: «бу түргә асасән аптоном районимиз кәлгүси төт йил ичидә һалқилиқ техникиларда бөсүш һасил қилидиған, нуқтилиқ кәсипләрни тәрәққий қилдуридиған, йеңидин гүлләнгән пәнләргә йетәкчилик қилидиған 600 алим вә пән-техника ихтисас игисини шинҗаңға келип игилик тикләшкә җәлп қилиду».

Чәтәлләрдики уйғур көзәткүчилири хитай һөкүмитиниң йиллардин бери һәрхил нам вә сиясәтләр астида уйғур елиға пиланлиқ һалда көчмән йөткәватқанлиқини вә уларни алаһидә имтиязлар билән тәминләватқанлиқини билдүрмәктә. Бу әһвал, хәлқара кишилик һоқуқ органлириниң доклатлиридиму көп қетим тилға елинған болуп, улар өз доклатлирида хитай һөкүмитиниң хитай көчмәнләрни уйғур елиға юқири мааш билән көчүшкә чақирғанниң әксичә, йәрлик уйғур яшлириға иш бәрмәй яки уларни ешинча әмгәк күчи дегән нам билән хитай өлкилиригә йөткәватқанлиқини тәнқид қилған иди. Әмма чен чүәнго уйғур аптоном райониға партком секретари болуп кәлгәндин буян хитай һөкүмитиниң бундақ сиясәтлириниң салмиқини йәниму ашурғанлиқи көрүлмәктә.

Пикирләр (0)
Share
Толуқ бәт