Xitay hökümiti Uyghur éligha xitay ölkiliridin "Ixtisasliq xadim" yötkesh salmiqini zoraytidiken

Muxbirimiz irade
2017-03-30
Élxet
Pikir
Share
Print

Xitay hökümitining "Ixtisasliq xadim" namida téximu köp xitay yashlirini Uyghur éligha yötkep ishqa orunlashturidighanliqi melum bolmaqta.

Xitayning "Xelq tori" ning 30- mart küni tarqatqan xewiride éytilishiche, Uyghur aptonom rayonluq adem küchi bayliqi we ijtima'iy kapalet nazariti kelgüsi nechche yilda "Ixtisasliqlarni jelp qilip, aqillarni kirgüzüsh" dégen siyasitige asasen yuqiri ma'ash bérish, mukapatlash, yéshil yol échish qatarliq tedbirler arqiliq xitay ölkiliridiki "Ixtisasliqlar" ni Uyghur éligha yötkesh salmiqini ashuridiken.

Buningdin sirt, Uyghur rayon da'iriliri yene "Aptonom rayonning yuqiri qatlimi jiddiy éhtiyajliq ixtisas igisini kirgüzüsh qurulushi" namliq türnimu yolgha qoyidiken. Xewerde bu tür heqqide mundaq déyilgen: "Bu türge asasen aptonom rayonimiz kelgüsi töt yil ichide halqiliq téxnikilarda bösüsh hasil qilidighan, nuqtiliq kesiplerni tereqqiy qilduridighan, yéngidin güllen'gen penlerge yétekchilik qilidighan 600 alim we pen-téxnika ixtisas igisini shinjanggha kélip igilik tikleshke jelp qilidu".

Chet'ellerdiki Uyghur közetküchiliri xitay hökümitining yillardin béri herxil nam we siyasetler astida Uyghur éligha pilanliq halda köchmen yötkewatqanliqini we ularni alahide imtiyazlar bilen teminlewatqanliqini bildürmekte. Bu ehwal, xelq'ara kishilik hoquq organlirining doklatliridimu köp qétim tilgha élin'ghan bolup, ular öz doklatlirida xitay hökümitining xitay köchmenlerni Uyghur éligha yuqiri ma'ash bilen köchüshke chaqirghanning eksiche, yerlik Uyghur yashlirigha ish bermey yaki ularni éshincha emgek küchi dégen nam bilen xitay ölkilirige yötkewatqanliqini tenqid qilghan idi. Emma chén chüen'go Uyghur aptonom rayonigha partkom sékrétari bolup kelgendin buyan xitay hökümitining bundaq siyasetlirining salmiqini yenimu ashurghanliqi körülmekte.

Toluq bet