Уйғур елидә йәнә 10 миң «алий мәлуматлиқ яш» ишқа орунлаштурулмақчи

Мухбиримиз ирадә
2019-08-01
Елхәт
Пикир
Share
Принт

Шинхуа агентлиқиниң хәвиридин қариғанда, уйғур аптоном районлуқ даириләр 2019-йилидин 2021-йилиғичә болған 3 йил арилиқта йәнә 10 миң нәпәр алий мәктәп пүттүргән яшларни ишқа орунлаштурушни пиланлимақтикән.

Хәвәрдә көрситилишичә, уйғур елидә ишқа орунлаштурулидиған яшлар әгәр һәрқайси хизмәт орунлири билән икки йилдин артуқ хизмәт тохтами түзсә, алаһидә турмуш капаләтлиридин бәһримән болидикән.

Шинхуа агентлиқиниң хәвиридә гәрчә уйғур елидә ишқа орунлаштурулидиғанларниң милләт тәркиби ениқ тилға елинмиған болсиму, әмма чәтәлләрдики уйғур көзәткүчиләр юқириқи пиланниң хитай дөләт ишлири кабинети тәрипидин тәстиқланған «3 йил ичидә йүзмиң яшни ишқа орунлаштуруш» пиланиниң бир қисми икәнликини, уйғур елидә ишқа орунлаштурулидиған яшларниң мутләқ көп қисминиң хитай өлкилиридин келидиған хитай алий мәктәп оқуғучилири болидиғанлиқини мөлчәрлимәктә.

Уйғур районидики һәрқайси дәриҗилик орунларда чиқириливатқан хизмәтчи қобул қилиш еланлириниң интайин көплүки күчлүк диққәт қозғаватқан әһвалларниң бири. Техи алдинқи күни хитай һөкүмитиниң «ғәрб пилани» бойичә хитай өлкилиридин топланған 3300 дин артуқ хитай оқуғучи үрүмчи шәһиридики шинҗаң йеза игилик университетида өткүзүлгән мурасим билән асасий қатламларға йолға селинған иди. Уйғур аптоном райониниң муавин рәиси җав чоңҗю мурасимда сөз қилип, уларни «яхши ишләп мушу җайда йилтиз тартип қелиш» қа чақирған.

Чәтәлләрдики уйғур көзәткүчиләрниң қаришичә, хитай һөкүмити уйғур елидики лагерларда 2 милйонғичә уйғур, қазақ қатарлиқ йәрлик хәлқләрни қамаш, аталмиш «завут» ларда ишқа орунлаштуруш қатарлиқ васитиләр арқилиқ контрол қилса, униң орниға һәдәп хитай өлкилиридин әмгәк күчи йөткимәктикән.

Пикирләр (0)
Share
Толуқ бәт