Uyghur élide yene 10 ming "Aliy melumatliq yash" ishqa orunlashturulmaqchi

Muxbirimiz irade
2019-08-01
Élxet
Pikir
Share
Print

Shinxu'a agéntliqining xewiridin qarighanda, Uyghur aptonom rayonluq da'iriler 2019-yilidin 2021-yilighiche bolghan 3 yil ariliqta yene 10 ming neper aliy mektep püttürgen yashlarni ishqa orunlashturushni pilanlimaqtiken.

Xewerde körsitilishiche, Uyghur élide ishqa orunlashturulidighan yashlar eger herqaysi xizmet orunliri bilen ikki yildin artuq xizmet toxtami tüzse, alahide turmush kapaletliridin behrimen bolidiken.

Shinxu'a agéntliqining xewiride gerche Uyghur élide ishqa orunlashturulidighanlarning millet terkibi éniq tilgha élinmighan bolsimu, emma chet'ellerdiki Uyghur közetküchiler yuqiriqi pilanning xitay dölet ishliri kabinéti teripidin testiqlan'ghan "3 Yil ichide yüzming yashni ishqa orunlashturush" pilanining bir qismi ikenlikini, Uyghur élide ishqa orunlashturulidighan yashlarning mutleq köp qismining xitay ölkiliridin kélidighan xitay aliy mektep oqughuchiliri bolidighanliqini mölcherlimekte.

Uyghur rayonidiki herqaysi derijilik orunlarda chiqiriliwatqan xizmetchi qobul qilish élanlirining intayin köplüki küchlük diqqet qozghawatqan ehwallarning biri. Téxi aldinqi küni xitay hökümitining "Gherb pilani" boyiche xitay ölkiliridin toplan'ghan 3300 din artuq xitay oqughuchi ürümchi shehiridiki shinjang yéza igilik uniwérsitétida ötküzülgen murasim bilen asasiy qatlamlargha yolgha sélin'ghan idi. Uyghur aptonom rayonining mu'awin re'isi jaw chongjyu murasimda söz qilip, ularni "Yaxshi ishlep mushu jayda yiltiz tartip qélish" qa chaqirghan.

Chet'ellerdiki Uyghur közetküchilerning qarishiche, xitay hökümiti Uyghur élidiki lagérlarda 2 milyon'ghiche Uyghur, qazaq qatarliq yerlik xelqlerni qamash, atalmish "Zawut" larda ishqa orunlashturush qatarliq wasitiler arqiliq kontrol qilsa, uning ornigha hedep xitay ölkiliridin emgek küchi yötkimektiken.

Toluq bet