Өзбекистанниң йеңи нөвәтлик президент намзатлири бекитилгән

Мухбиримиз қутлан
2016-10-29
Елхәт
Пикир
Share
Принт


Ислам кәримофниң өлүмидин кейин, өзбекистанниң йеңи нөвәтлик президентлиқини зади кимниң өткүзивалидиғанлиқи көзәткүчиләрниң диққәт нуқтисида туруп кәлгән иди. Чүнки йеңи нөвәтлик өзбәк президентиниң һәқиқий вә демократик сайлам арқилиқ һоқуқ тапшуривелиши ислам кәримоф дәвридә оттура асиядики әң мустәбит дөләткә айланған өзбекистанниң демократийәлишиш йолиға меңишиниң бишарити болуп қалатти.

Өзбекистан дөләт таратқулириниң хәвиригә қариғанда, 28 - өктәбир күни өзбекистан мәркизи сайлам комитети йиғин ечип, 12 - айниң 4 - күни өткүзилидиған өзбекистанниң йеңи нөвәтлик президент сайлимиға қатнишиш салаһийитигә игә намзатларни таллап чиққан.

Игилинишичә, өзбекистан мәркизи сайлам комитети өзбекистандики төт партийәдин җәмий төт нәпәр президент намзатини таллап чиққан болуп, улар «миллий тәрәққият демократик партийәси» дин сәрвәр сәйдуллайеф, «тәдбиркарлар вә ақиллар һәркити әркин демократик партийәси» дин шәвкәт мирзайеф, «хәлқ демократик партийәси» дин һатәмҗан абдураһманоф вә «адаләт сотсиял демократик партийәси» дин нәриман мәҗитоф қатарлиқлар икән.

Президент намзатлиқиға көрситилгән бу 4 нәпәр намзат бүгүн, йәни 29 - өктәбирдин башлап өзбекистандики һәрқайси мәтбуат вә ахбаратларда һәмдә аммивий таратқуларда сайлам тәшвиқатлирини рәсмий башлайдикән. Өзбекистан мәркизи сайлам комитетиниң 4 - декабирда өткүзилидиған президент сайлимиға яврупа хәвпсизлик вә һәмкарлиқ тәшкилатини назарәтчиликкә тәклип қилғанлиқи мәлум.

Көзәткүчиләр, өзбекистан сайлам комитетиниң бу қетимлиқ президент сайлимини демократик усулда өткүзүшкә көрүнүш һазирлаватқанлиқини, әмәлийәттә 4 - декабирдики президент сайлиминиң нәтиҗиси пүтүнләй дегүдәк һазир вақитлиқ һоқуқ йүргүзиватқан баш министер шәвкәт мирзайефниң ирадиси бойичә болуватқанлиқини илгири сүрмәктә.

Пикирләр (0)
Share
Толуқ бәт