Таҗсиман вирусниң лагерларға тәһдит болуватқанлиқи давамлиқ диққәт қозғимақта

Мухбиримиз әзиз
2020-05-12
Елхәт
Пикир
Share
Принт

Пүтүн дуняға ямраватқан таҗсиман вируси ваба сүпитидә аллиқачан төт милйондин артуқ кишигә юқуп болғанда буниң хитай лагерлиридики милйонлиған уйғурға еғир тәһдит болуватқанлиқи йәнә бир қетим диққәт қозғиди. «Фокус хәвәрлири» ниң 12-майдики хәвиридә ейтилишичә, лагер һәққидики мәлумат ташқи дуняға көпләп мәлум болуватқандиму бир қисим дөләтләрниң хитай билән «даимқидәк сода алақисидә болуши» лагерларниң давамлиқ мәвҗут болуши һәмдә бу җайдики мәһбусларниң вирус һуҗумиға учришиға шараит яритип бәрмәктә икән.

Австралийәдики җеймис кук университетиниң сәһийә вә сағламлиқ пәнлири тәтқиқатчиси анна хайес бу һәқтә мухбирниң зияритини қобул қилғанда хитайдики «ишләпчиқиришни әслигә кәлтүрүш» долқуниға әгишип лагерлардики мәҗбурий әмгәкниңму әслигә келиватқанлиқини, буниң билән таҗсиман вирусниң тарқилишиға йеңидин шараит һазирлиниватқанлиқини билдүргән. У бу һәқтә сөз қилип «лагерлардики вирус юқуми йеңидин тутқун қилинғанлар яки хоҗайинлар яки тазилиқ ишчилири дегәндәк сиртта юқумлинип болған кишиләрниң васитиси билән лагерларға тарқилиши мумкин» дегән.

Аннаниң билдүрүшичә, лагерлардики турмуш шараитиниң начарлиқи вирусниң көпләп ямришиға әң зор дәриҗидә шараит яритип беридикән. Йәнә келип нәччә онлиған кишиниң бир камерға қамап қоюлуши сәвәблик вирус бирла кишигә юқса һәммәйләнниң юқумлиниши келип чиқидикән. Әмма һазирғичә хитай һөкүмитиниң вирус һәққидики учурларни қаттиқ контрол қилиши сәвәблик лагерлардики вирус юқуми һәққидики мәлуматлар йоқниң ‍орнида икән.

Һалбуки, хитай һөкүмити ташқи дуняниң лагерлар һәққидики бу хил әйибләшлирини рәт қиливатқан болуп, техи йеқинда лагерлардики вирус тәһдити һәққидә пикир қилған Breitbart News агентлиқини «учиға чиққан оңчиллиқ билән ирқчилиқ қилмақта, шундақла мусулманларға қарши тәшвиқатқа көпләп орун аҗратмақта» дәп тәнқидлигән.

Пикирләр (0)
Share
Толуқ бәт