«Вашингтон почтиси» гезитиниң тәһрират мақалиси: «дуня шинҗаңдики әһвал ашкарилиғучини йәргә қаратмаслиқи керәк»

Мухбиримиз ирадә
2019-11-21
Елхәт
Пикир
Share
Принт

«Вашингтон почтиси» гезити уйғур елидики вәзийәткә қарита җиддий тәдбир елиш һәққидә йәнә бир парчә тәһрират мақалиси елан қилди.

20-Ноябир күни «дуня шинҗаңдики әһвал ашкарилиғучини йәргә қаратмаслиқи керәк» мавзусида елан қилинған бу тәһрират мақалисидә уйғур елидики лагер түзүмигә аит йеқинда ашкариланған ички һөҗҗәт арқилиқ хитай һөкүмитиниң уйғур елидики сияситиниң һәқиқий йүзи ашкариланғанлиқи тәкитләнгән. Униңда «мана бу мәдәнийәт қирғинчилиқиниң һәқиқий йүзи. Хитай уйғур, қазақ вә башқа мусулман түркий милләтләрниң тилини, өрп-адәтлирини вә динини йоқ қиливатиду. Уларни йиғивелиш лагерлириға қамап, меңисини компартийәниң идийәси билән толдуруватиду. ‹Ню-йорк вақти гезити' тәрипидин ашкариланған ички һөҗҗәт бу һәрикәтниң хитай дөләт рәиси ши җинпиңни өз ичигә алған әң юқири қатламдики рәһбәрләр тәрипидин бекитилгәнликини ашкарилап бәрди,» дейилгән.

«Вашингтон почтиси» гезитиниң тәһрират мақалисидә хитай һөкүмити «кишиләр һәқсиз һалда тәрбийәлинидиған җай» дәп тәшвиқ қиливатқан бу мәркәзләрниң уйғурлар вә башқиларниң мәдәнийитини йоқ қилиш үчүн йолға қоюлған зор көләмдики түрмә лагерлири икәнликини әскәрткән. Улар дуняни ши җинпиң һөкүмити қиливатқан бу зулумға қарита һәрикәткә өтүшкә чақирип, мундақ дәп язған:

«Хитай рәһбәрлири чәтәлләрниң лагерлар һәққидики соаллирини давамлиқ һалда ‹бу хитайниң ички иши' дәп туруп рәт қилди. ‹Ню-йорк вақти гезити' ниң ейтишичә, улар бу һөҗҗәтни хитайниң сиясий рәһбәрлик қатлимидики биридин, йәни ши җинпиң қатарлиқларниң зор көләмлик тутқун үчүн җазаға тартилишини үмид қилидиған биридин алған икән. Дуня мана бу әһвал ашкарилиғучини йәргә қаратмаслиқи керәк.»

«Ню-йорк вақти гезити» 16-ноябир күни хитай һөкүмитиниң уйғур елидики лагер сияситигә аит 400 бәттин артуқ бир мәхпий һөҗҗитини дуняға ашкарилап, зор ғулғула қозғиған. Бу һөҗҗәт хитайниң бүгүнгә қәдәр хәлқарада лагерлар һәққидә елип бериватқан тәшвиқатини йоққа чиқарған бурулуш характерлик бир пакит, дәп қаралмақта.

Пикирләр (0)
Share
Толуқ бәт