"Washin'gton pochtisi" gézitining tehrirat maqalisi: "Dunya shinjangdiki ehwal ashkarilighuchini yerge qaratmasliqi kérek"

Muxbirimiz irade
2019-11-21
Élxet
Pikir
Share
Print

"Washin'gton pochtisi" géziti Uyghur élidiki weziyetke qarita jiddiy tedbir élish heqqide yene bir parche tehrirat maqalisi élan qildi.

20-Noyabir küni "Dunya shinjangdiki ehwal ashkarilighuchini yerge qaratmasliqi kérek" mawzusida élan qilin'ghan bu tehrirat maqaliside Uyghur élidiki lagér tüzümige a'it yéqinda ashkarilan'ghan ichki höjjet arqiliq xitay hökümitining Uyghur élidiki siyasitining heqiqiy yüzi ashkarilan'ghanliqi tekitlen'gen. Uningda "Mana bu medeniyet qirghinchiliqining heqiqiy yüzi. Xitay Uyghur, qazaq we bashqa musulman türkiy milletlerning tilini, örp-adetlirini we dinini yoq qiliwatidu. Ularni yighiwélish lagérlirigha qamap, méngisini kompartiyening idiyesi bilen tolduruwatidu. 'nyu-york waqti géziti' teripidin ashkarilan'ghan ichki höjjet bu heriketning xitay dölet re'isi shi jinpingni öz ichige alghan eng yuqiri qatlamdiki rehberler teripidin békitilgenlikini ashkarilap berdi," déyilgen.

"Washin'gton pochtisi" gézitining tehrirat maqaliside xitay hökümiti "Kishiler heqsiz halda terbiyelinidighan jay" dep teshwiq qiliwatqan bu merkezlerning Uyghurlar we bashqilarning medeniyitini yoq qilish üchün yolgha qoyulghan zor kölemdiki türme lagérliri ikenlikini eskertken. Ular dunyani shi jinping hökümiti qiliwatqan bu zulumgha qarita heriketke ötüshke chaqirip, mundaq dep yazghan:

"Xitay rehberliri chet'ellerning lagérlar heqqidiki so'allirini dawamliq halda 'bu xitayning ichki ishi' dep turup ret qildi. 'nyu-york waqti géziti' ning éytishiche, ular bu höjjetni xitayning siyasiy rehberlik qatlimidiki biridin, yeni shi jinping qatarliqlarning zor kölemlik tutqun üchün jazagha tartilishini ümid qilidighan biridin alghan iken. Dunya mana bu ehwal ashkarilighuchini yerge qaratmasliqi kérek."

"Nyu-york waqti géziti" 16-noyabir küni xitay hökümitining Uyghur élidiki lagér siyasitige a'it 400 bettin artuq bir mexpiy höjjitini dunyagha ashkarilap, zor ghulghula qozghighan. Bu höjjet xitayning bügün'ge qeder xelq'arada lagérlar heqqide élip bériwatqan teshwiqatini yoqqa chiqarghan burulush xaraktérlik bir pakit, dep qaralmaqta.

Toluq bet