«Вашингтон почтиси» гезитидә әркин асия радийоси уйғур бөлүминиң хизмәтлири тонуштурулди

Мухбиримиз ирадә
2019-12-02
Елхәт
Пикир
Share
Принт

Америкадики нопузлуқ гезитләрдин «вашингтон почтиси» гезитидә әркин асия радийоси уйғур бөлүминиң хитай һөкүмити уйғур елидә йолға қойған лагерларни ашкарилаш вә униң бу һәқтики зор тәшвиқат һәрикитини бузуп ташлашта ойниған роли һәққидә бир парчә мақалә елан қилинди.

Мәзкур мақалә «вашингтон почтиси» гезитиниң 1-декабирдики санида тәһрират сәһиписи муһәррири фрәд һайет тәрипидин қәләмгә елинған. Аптор мақалисидә, «әгәр әркин асия радийоси уйғур бөлүминиң журналист вә тәһрирлиридин тәркиб тапқан 12 нәпәр хадими болмиған болса, бүгүн бәлким дуняниң инсанийәткә қарши ишлиниватқан җинайәттин хәвәрсиз қелиши мумкинликини» тәкитлигән.

У әркин асия радийоси уйғур бөлүми мухбирлириниң хитай һөкүмитиниң уларниң юртидики ата-ана вә башқа уруқ-туғқанлирини тутқун қилиш, қорқутуш арқилиқ ишләткән бесимиға боюн әгмәй, униң зор көләмлик тәшвиқат аппаратлириға тақабил турғанлиқини баян қилған. Мақалидә мунулар дейилгән:

«Әркин асия радийоси уйғур бөлүм мухбирлири лагерларда йүз бериватқан зор өлүм вәқәлирини мәсулийәтчанлиқ билән хәвәр қилди. Хәвәрләрни һессиятқа тайинип туруп әмәс, аз дегәндә икки вә униңдин көп ишәнчлик мәнбәгә тайинип туруп хәвәр қилди. Уларниң лагерлар һәққидики хәвири дәсләптә 2017-йили елан қилинғанда нурғун кишиләр гуман билән қариди. Әмма мәлум вақиттин кейин бу хәвәрләрниң тоғрилиқи гугул сүний һәмраһ арқилиқ тартқан сүрәтләр, чәтәллик академиклар вә башқа журналистлар тәрипидин вә йеқинда хитай компартийәсигә аит ашкариланған бир алаһидә муһим һөҗҗәт арқилиқ испатланди».

Аптор фрәд һайет хитай һөкүмитиниң нәтиҗидә әркин асия радийоси мухбирлириниң аилә әзалирини тутқун қилиш арқилиқ уларға тәһдит қилғанлиқи, буму әсқатмиғандин кейин уларниң уйғур райониға телефон қилип әһвал игилишиниң алдини елиш үчүн аваз тонуш техникиси арқилиқ улар қилған телефонларни үзүветишкә охшаш бир қатар техникилиқ қийинчилиқларни туғдурғанлиқини баян қилған.

Мақалидә, лагерға тутқун қилиш вә лагерлардики зор көләмлик өлүм вәқәлири, қейин-қистақ, чошқа гөши йейишкә мәҗбурлиниш, җинсий хорлаш вә һәрбир өйгә йәрләштүрүлгән аталмиш «хитай туғқанлар» билән бир кариватта ухлаш қатарлиқ муһим хәвәрләрниң һәммисиниң уйғур бөлүми мухбирлириниң йәрликтин вә лагер шаһидлиридин игилигән биваситә учурлири асасида дуняға ашкариланғанлиқини тәкитлигән.

Пикирләр (0)
Share
Толуқ бәт