"Washin'gton pochtisi" gézitide erkin asiya radiyosi Uyghur bölümining xizmetliri tonushturuldi

Muxbirimiz irade
2019-12-02
Élxet
Pikir
Share
Print

Amérikadiki nopuzluq gézitlerdin "Washin'gton pochtisi" gézitide erkin asiya radiyosi Uyghur bölümining xitay hökümiti Uyghur élide yolgha qoyghan lagérlarni ashkarilash we uning bu heqtiki zor teshwiqat herikitini buzup tashlashta oynighan roli heqqide bir parche maqale élan qilindi.

Mezkur maqale "Washin'gton pochtisi" gézitining 1-dékabirdiki sanida tehrirat sehipisi muherriri fred hayét teripidin qelemge élin'ghan. Aptor maqaliside, "Eger erkin asiya radiyosi Uyghur bölümining zhurnalist we tehrirliridin terkib tapqan 12 neper xadimi bolmighan bolsa, bügün belkim dunyaning insaniyetke qarshi ishliniwatqan jinayettin xewersiz qélishi mumkinlikini" tekitligen.

U erkin asiya radiyosi Uyghur bölümi muxbirlirining xitay hökümitining ularning yurtidiki ata-ana we bashqa uruq-tughqanlirini tutqun qilish, qorqutush arqiliq ishletken bésimigha boyun egmey, uning zor kölemlik teshwiqat apparatlirigha taqabil turghanliqini bayan qilghan. Maqalide munular déyilgen:

"Erkin asiya radiyosi Uyghur bölüm muxbirliri lagérlarda yüz bériwatqan zor ölüm weqelirini mes'uliyetchanliq bilen xewer qildi. Xewerlerni héssiyatqa tayinip turup emes, az dégende ikki we uningdin köp ishenchlik menbege tayinip turup xewer qildi. Ularning lagérlar heqqidiki xewiri deslepte 2017-yili élan qilin'ghanda nurghun kishiler guman bilen qaridi. Emma melum waqittin kéyin bu xewerlerning toghriliqi gugul sün'iy hemrah arqiliq tartqan süretler, chet'ellik akadémiklar we bashqa zhurnalistlar teripidin we yéqinda xitay kompartiyesige a'it ashkarilan'ghan bir alahide muhim höjjet arqiliq ispatlandi".

Aptor fred hayét xitay hökümitining netijide erkin asiya radiyosi muxbirlirining a'ile ezalirini tutqun qilish arqiliq ulargha tehdit qilghanliqi, bumu esqatmighandin kéyin ularning Uyghur rayonigha téléfon qilip ehwal igilishining aldini élish üchün awaz tonush téxnikisi arqiliq ular qilghan téléfonlarni üzüwétishke oxshash bir qatar téxnikiliq qiyinchiliqlarni tughdurghanliqini bayan qilghan.

Maqalide, lagérgha tutqun qilish we lagérlardiki zor kölemlik ölüm weqeliri, qéyin-qistaq, choshqa göshi yéyishke mejburlinish, jinsiy xorlash we herbir öyge yerleshtürülgen atalmish "Xitay tughqanlar" bilen bir kariwatta uxlash qatarliq muhim xewerlerning hemmisining Uyghur bölümi muxbirlirining yerliktin we lagér shahidliridin igiligen biwasite uchurliri asasida dunyagha ashkarilan'ghanliqini tekitligen.

Toluq bet