Xitay hökümiti 25-séntebir küni "Yéngi dewrdiki wetenperwerlik terbiyesini emiliyleshtürüsh programmisi" ni élan qilip, ma'arip saheside "Wetenperwerlik terbiyisi" ni qet'iy éghishmastin ijra qilish chaqiriqini otturigha qoydi.
"Tengritagh tori" ning 28-séntebirdiki xewiride éytilishiche, pütün Uyghur diyaridiki herqaysi ma'arip orunliri we mektepler "Wetenperwerlik" ni chöridigen yette türlük mezmunni barliq oqutquchi we oqughuchilarning "Yürek qénigha aylandurush" qa chaqirilghan. Shundaqla oqutquchilar ülge bolush, oqughuchilar qet'iy egishish sheklide medeniy-ma'arip saheside "Wetenperwerlik" ni ishqa ashurush tekitlen'gen.
Halbuki muhajirettiki Uyghur közetküchiler bu yerde tekitliniwatqan "Wetenperwerlik" ning emeliyette xitay kimlikini menbe qilghan atalmish "Jungxu'a döliti" ni, yeni xitay dölitini söyüshni asas qilghan ménge yuyush herikiti ikenlikini, buning nöwette Uyghurlarni lagérgha qamash arqiliq idiye özgertishtin bashqa yene lagér sirtidiki Uyghurlarnimu xitaylashturusha chaqiriqi ikenlikini bildürdi.
Melum bolushiche, nöwette Uyghur diyarida Uyghurlarning milliy kimlikini namayan qilidighan herqandaq maddiy we meniwi hadisiler birdek "Esebiylik" ning ipadisi, dep qariliwatqan bolup, bu qétimqi yéngi chaqiriq boyiche Uyghurlarning xitaylardin perqlinidighan barliq alahidiliki "Wetenperwerlik terbiyisi" namida yoqilish aldida turmaqtiken.
