Хитай һөкүмити 25-сентәбир күни «йеңи дәврдики вәтәнпәрвәрлик тәрбийәсини әмилийләштүрүш программиси» ни елан қилип, маарип саһәсидә «вәтәнпәрвәрлик тәрбийиси» ни қәтий еғишмастин иҗра қилиш чақириқини оттуриға қойди.
«Тәңритағ тори» ниң 28-сентәбирдики хәвиридә ейтилишичә, пүтүн уйғур дияридики һәрқайси маарип орунлири вә мәктәпләр «вәтәнпәрвәрлик» ни чөридигән йәттә түрлүк мәзмунни барлиқ оқутқучи вә оқуғучиларниң «йүрәк қениға айландуруш» қа чақирилған. Шундақла оқутқучилар үлгә болуш, оқуғучилар қәтий әгишиш шәклидә мәдәний-маарип саһәсидә «вәтәнпәрвәрлик» ни ишқа ашуруш тәкитләнгән.
Һалбуки муһаҗирәттики уйғур көзәткүчиләр бу йәрдә тәкитлиниватқан «вәтәнпәрвәрлик» ниң әмәлийәттә хитай кимликини мәнбә қилған аталмиш «җуңхуа дөлити» ни, йәни хитай дөлитини сөйүшни асас қилған меңә ююш һәрикити икәнликини, буниң нөвәттә уйғурларни лагерға қамаш арқилиқ идийә өзгәртиштин башқа йәнә лагер сиртидики уйғурларниму хитайлаштуруша чақириқи икәнликини билдүрди.
Мәлум болушичә, нөвәттә уйғур диярида уйғурларниң миллий кимликини намаян қилидиған һәрқандақ маддий вә мәниви һадисиләр бирдәк «әсәбийлик» ниң ипадиси, дәп қариливатқан болуп, бу қетимқи йеңи чақириқ бойичә уйғурларниң хитайлардин пәрқлинидиған барлиқ алаһидилики «вәтәнпәрвәрлик тәрбийиси» намида йоқилиш алдида турмақтикән.
