Wuxende partlighan wirus yuqumida 500 mingdek xitay shirkiti taqalghan

Muxbirimiz erkin
2020-04-06
Élxet
Pikir
Share
Print

Xitayning wuxen shehiride partlighan korona wirusi yuqumida 500 gha yéqin xitay shirkiti taqilip, xitayning bu yil 1-pesildiki iqtisadigha qattiq tesir qilghan.

"Jenubiy xitay etigenlik pochtisi" gézitining ashkarilishiche, bu qétimqi yuqumda 460 mingdin artuq xitay shirkiti menggülük taqalghan. Bu shirketlerning yérimidin köpreki yéngi karxanilar bolup, ulargha téxi 3 yil bolmighan iken. Bu mezgil ichide yene yéngi qurulghan tijaret orunlirining sani zor derijide azayghan. Xewerde bu yil 1-we 2-aylarda bu xil orunlarning ötken yilqidin 29 pirsent azayghanliqi bildürülgen.

Bu karxanilarning mutleq köp qismi xitayning gu'angdunggha oxshash en'eniwi iqtisadiy bazilirigha jaylashqan iken. Xewerde xitayning yuqumni kontrol qilghanliqini ilgiri sürsimu, lékin wirus yuqumining bashqa döletlerge tarqilip, dunyawi yuqumgha aylinishi arqisida xitay zawutlirigha bérilgen nurghun zakaz mallarning bikar qilin'ghanliqi, bu gu'angdungdiki "Donggu'en karamet oyunchuq shirkiti" dek nurghun xitay karxanilirining weyran bolushini keltürüp chiqarghanliqini bildürgen.

Xewerde qeyt qilinishiche, nöwette xitaydiki nurghun karxanilar özlirining weyran bolghanliqini élan qilishni kütüp turuwatqan bolsimu, lékin da'iriler ularning iltimasini qobul qilishni kéchiktürmekte iken. Xewerde béyjingdiki bir adwokatning sözi neqil keltürülgen bolup, u: "Biz nurghun karxanilarning weyran bolush girdabigha kelgenlikini bilimiz. Lékin ular buni élan qilmaywatidu yaki derhal weyran bolush iltimasi sun'ghuzmaywatidu," dégen.

Toluq bet