Korona wirusi bilen yuqumlan'ghuchilarning sani dawamliq ashmaqta

Muxbirimiz irade
2020-02-27
Élxet
Pikir
Share
Print

 

"Tengritagh tori" 27-féwral küni tarqatqan xewiride Uyghur élida yene 9 neper korona wirusi yuqumlan'ghuchisining saqiyip doxturxanidin chiqqanliqi, netijide saqayghanlar sanining 43 neperge yetkenlikini ilgiri sürdi. Biraq xewerde yuqumlan'ghuchilar we közitish astida turuwatqanlar heqqide héchqandaq sanliq melumat bérilmidi.


Xitay döletlik sehiye komitéti 26-féwral küni kéche sa'et 24:00 kiche bolghan ariliqta memliket miqyasida yene 433 kishining yuqumlan'ghanliqini doklat qildi. Roytérs agéntliqining xewer qilishiche, bu bir kün ilgiriki élan qilin'ghan 406 neperdin köp iken. Béyjing shehirimu aldinqi küni yéngidin yuqumlan'ghuchilar sanini 0 dep élan qilghan bolsimu, biraq u 26-féwral küni yéngidin yuqumlan'ghuchilar sanini 10 dep élan qilghan. Netijide xitayda omumiy yuqumlan'ghuchi sani 78,497 ge, ölgen kishi sani 2,744 ge yetken. 

Xitayning hökümet axbarat wasitiliri Uyghur élining yuqum ehwali heqqidiki sanliq melumatlarni yéngilashni 19-féwral künidin étibaren toxtatqan idi. Uning bu herikiti korona wirusining lagérlarda tutup turuluwatqan milyonlarche bigunah kishige yuqush éhtimalliqi chet'ellerde diqqet qozghighan mezgilge toghra kelgen bolghachqa, küchlük guman qozghighan. 

Korona wirusi hazir dunyaning herqaysi jayliridimu keng tarqiliwatqan bolup, bularning ichide iran, jenubiy koriye we italiyening ehwali bir qeder éghir. Hazir dunya miqyasida wirus bilen yuqumlan'ghuchilar omumiy sani82,446 ge, ölgenler 2,808 neperge yetken. 

Dunya sehiye teshkilatining bashliqi bügün qilghan sözide barliq döletlerni wirusqa teyyarliq qilishqa agahlandurup: "Herqandaq bir dölet bizge bu wirus kelmeydu, dep oylap qalsa u halda bu ejellik xataliq ötküzgenlik bolidu," dégen.

 

Toluq bet