Ройтерс агентлиқи, хитайниң уйғур районидики аманлиқ тәдбирлириниң уйғурларни биарам қиливатқанлиқини хәвәр қилди

Мухбиримиз әркин
2017-03-31
Елхәт
Пикир
Share
Принт

Ройтерс агентлиқи җүмә күни хәвәр тарқитип, хитайниң уйғур районида алған қаттиқ бихәтәрлик тәдбирлирини хәлқниң аманлиқини қоғдаш, дәп чүшәндүрсиму, бирақ буниң уйғурларни қаттиқ биарам қиливатқанлиқини билдүрди.

Хәвәрдә қәйт қилишичә, ройтерсниң бир мухбири йеқинда қәшқәр вә хотәнләрни зиярәт қилип, қәшқәрдә «террорлуқ»қа қарши өткүзүлгән хәлқ маневири, хотәндә өткүзүлгән байрақ чиқириш мурасими вә диний тәрбийә йиғинлириға шаһит болған.

Хәвәрдә, қәшқәрдә дуканларға мәҗбурий рәқәмлик бихәтәрлик ишики, сигнал вә видео камера орунлаштурулғанлиқини, дукан ичидики видео камераларниң сақчиға йоллинидиғанлиқини алаһидә әскәртип, өзиниң қәшқәрдә көргән бир коча маневирини мисалға алған.

Мухбирниң көрситишичә, қәшқәрдә һәр қетим агаһландуруш сигнали челинса, қәшқәр рәстилиридики дукандарлар һөкүмәт тарқитип бәргән калтәклирини көтүрүп талаға чиқишқа мәҗбуркән.

Хәвәрдә йәнә, қәшқәрдики йәрлик тиҗарәтчиләрниң сөзини нәқил кәлтүрүп, бу хил аманлиқ тәдбирлиригә қәшқәр хәлқиниң қаттиқ наразилиқини билдүргән. Хәвәрдә қәйт қилишичә, қәшқәрдики бир уйғур тиҗарәтчи ройтерсниң мухбириға «бизниң һечқандақ мәхпийәтликимиз қалмиди. Улар сизниң һәммә ишиңизни көрүп турушни истәйду» дегән. Хәвәрдә йәнә, бу йил 5‏-айда бейҗиңда бир йол, бир бәлвағ хәлқара башлиқлар йиғини ечилидиғанлиқини, хитай даирилириниң йиғин мәзгилидә зор көләмлик бир һуҗумға учраштин әндишә қилидиғанлиқини билдүрүп, бирақ, чәтәл мутәхәссислири уйғур районида һәммә нәрсиниң аманлиққа мәркәзлишип қелиши, бейҗиңниң «бир йол, бир бәлвағ » нишаниға зит, дәп қарайдиғанлиқини илгири сүргән.

Пикирләр (0)
Share
Толуқ бәт