Инфентино, уйғур мәсилисигә қаримай дуня путбол кулублири мусабиқисиниң хитайға берилгәнликини ақлиди

Мухбиримиз әркин
2019-12-20
Елхәт
Пикир
Share
Принт

Хәлқара путбол бирләшмисиниң рәиси инфентино хәлқарада хитайниң уйғурларға тутқан муамилисигә қарита тәнқидләр күчийиватқан мәзгилдә дуня путбол кулублириниң путбол мусабиқиси саһибханлиқиниң хитайға берилгәнликини ақлиған. У 20‏-декабир күни қатар пайтәхти дохада мухбирларға сөз қилип, «бәлким, кишиләр хитайға яки дуняниң һәрқандақ бир җайиға берип вә топ ойнап буниңға охшаш мәсилиләр һәққидә давамлиқ сөзлийәләйду, бу мәсилини оттуриға қоялайду. Бәлким, ахирида хәлқниң вәзийити яхшилинип қелиши мумкин» дегән. Хәлқара путбол бирләшмиси бу йил 10‏-айда 2020‏-йиллиқ дуня кулублар путбол мусабиқисиниң саһибханилиқ һоқуқиниң шаңхәй шәһиригә берилгәнликини елан қилған.

Путбол бирләшмисиниң хитай һөкүмити 3 милйонғичә болған уйғур, қазақ вә башқа түркий милләт кишилирини лагерларға қамап, хәлқараниң қаттиқ наразилиқиға учраватқан мәзгилдә саһибханилиқни хитайға бериши хәлқарада қаттиқ ғулғула қозғиған. Өткән һәптә германийәлик путбол чолпини, әнглийә арсенал кулубиниң путболчиси мәсут өзил хитайниң уйғурларға тутқан муамилисини, шундақла мусулманларниң буниңға сүкүт қиливатқанлиқини тәнқидлигәниди. 

Хәлқара путбол бирләшмиси йәнә хәлқарада бейҗиң қишлиқ олимпик мусабиқисини байқут қилиш чақириқи күчийиватқан мәзгилдә саһибханлиқни шаңхәйгә бәргән. Бу һәптә америка кеңәш палата әзаси рик скот билән җош ховлей америка дөләтлик путбол җәмийити NBA универсалниң директори стефан бурк билән NBA олимпикиниң президети гәрий зенкилға мәктуп йезип, уларни бейҗиңниң қишлиқ олимпик мусабиқисигә саһибханлиқ қилишини бикар қилиш һәққидә хәлқара олимпик комитетиға илтимас қилишини тәләп қилған.

Рик скот билән җош ховлей мәктубида, хитайниң ноқул диний етиқади сәвәблик бир милйондин артуқ уйғурни «қайта-тәрбийәләш лагерлири» ға қамиғанлиқини билдүрүп, буниң йеқинда ашкариланған һөҗҗәтләрдә испатланғанлиқини тәкитлигән. Лекин, франсийә агентлиқиниң хәвиридә тәкитлинишичә, инфентино җүмә күни қатарда мухбирларға қилған сөзидә йәнә, «дуня һәл қилалмиған мәсилиләрни хәлқара путбол бирләшмиси һәл қилалмайдиғанлиқи» ни билдүргән.

Пикирләр (0)
Share
Толуқ бәт