Аталмиш «шинҗаң вәкилләр өмики» ню йорк шәһиридә хитай тәшвиқатини давам әттүрмәктә

Мухбиримиз әзиз
2017-10-31
Елхәт
Пикир
Share
Принт

Хитай һөкүмитиниң уйғурлар дияридики қаттиқ қоллуқ сиясәтлири вә буниңға алақидар мәсилиләр ғәрб дунясидики һәрқайси ахбарат васитилиридә кәң йәр еливатқан бир мәзгилдә хитайлар асас қилип тәшкилләнгән «шинҗаң мәдәнийәт алмаштуруш вәкилләр өмики» өткән һәптә америкиға йетип кәлгән иди.

Мәзкур өмәк тексас штатидики тәшвиқатлирини тамамлиғандин кейин ню йорк шәһиригә кәлгән вә бу җайда хитай һөкүмитиниң уйғурлар сиясити һәққидики тәшвиқатини давам қилишқа башлиған.

Хитай һөкүмитиниң башқурушидики «хитай күндилик хәвәрлири» гезитиниң мақалисидә көрситилишичә, өмәк башлиқи зо фең «шәрқий қирғақ хитай җәмийәтлири иттипақи» қатарлиқ тәшкилаттикиләргә «шинҗаңдики аләмшумул өзгиришләрни өз көзи билән көрүп келиш» һәққидә лексийә сөзлигән. Шуниң билән биргә, уйғурлар дияриниң иқтисад, мәдәнийәт вә қатнаш саһәсидә, шуниңдәк инсан һәқлири вә миллий, диний сиясәтләр һәққидә қандақ «зор тәрәққиятлар» ға игә болғанлиқини чүшәндүргән.

Мәлум болушичә, мәзкур өмәкниң бу қетимқи йәнә бир муһим тәшвиқат темиси уйғурлар дияриниң хитай иҗра қиливатқан «бир бәлвағ бир йол қурулуши» дики «көзнәк» лик роли, шу мунасивәт билән уйғурларниң қандақ зор пурсәтләргә игә болидиғанлиқи икән.

Уйғурлар дияриниң вәзийитини йеқиндин көзитип келиватқан анализчилар бу һәқтә тохтилип, «бу хилдики өмәкләр ғәрб дунясиға уйғурлар дияри һәққидә хата вә ялған учурларни тарқитиш, шу арқилиқ хитай һөкүмитиниң уйғурларни бастуруш сияситиниң ‹һәққаний' икәнликигә җамаәт пикри топлашни мәқсәт қилған» дейишмәктә.

Пикирләр (0)
Share
Толуқ бәт